రోమా అధ్యయనం – 56 16:1-16 దేవుని కుటుంబం

 

రోమా అధ్యయనం – 56   16:1-16 

దేవుని కుటుంబం

     ఇంత కఠినమైన సమస్యలు ఎదుర్కోవడం అవసరమా? ఇవి ఏవి లేకుండా ఉంటే ఎంత బాగుండును? 

అనుకొంటున్నారా?ఇవన్నీ దేవునినుండి కలిగినవే, ఆయన సెలవు లేకుండా, మీరు విశ్వాసి అయితే  మీ

జీవితములోనైనా, నా జీవితములోనైనా ఏదీ కలుగదు. అంతే కాదు, వీటి ద్వారా, దేవుడు పరీక్షిస్తూ ఉండవచ్చు. 

లేదా ఏదో ఒక పాపము, అవిధేయత, తిరుగుబాటులో మనమున్నపుడు క్రమశిక్షణలో పెట్టి బాగు చేసేందుకు 

వాటిని అనుమతించి ఉండవచ్చు. “ప్రభువు తాను ప్రేమించువానిని శిక్షించి తాను స్వీకరించు ప్రతి కుమారుని  

దండించును అని కుమారులతో సంభాషించినట్లు మీతో సంభాషించు ఆయన హెచ్చరికను మరచితిరి.” హెబ్రీ 12:6  

ప్రభువు ప్రేమను గమనించి, అంగీకరించి ఆయన చేతుల్లో మలచబడుటకు అవసరమైనంత కృప 

మీకనుగ్రహించుగాక! 

     రేడియోద్వారా మనము కలుసుకుంటున్నా, మనమంతా క్రీస్తునందు సహోదర సహోదరీలము, గనుక ఒక్క 

కుటుంబము. ఏ కులమునుండి, ఏమతమునుండి వచ్చాము అనే విషయము అనవసరమైనది. ఏ ప్రాంతము, ఏ 

కుటుంబమునాకు చెందినవారము అనేది ఏ మాత్రం లెక్కలోకి రాదు.   రోమా 16:1-16లో ఆపో. పౌలు ఆయనకు 

ప్రియులైన దేవుని కుటుంబపు వారి జాబితా ఇచ్చాడు. రోమా 16:1-16.

            1. కెంక్రేయలో ఉన్న సంఘపరిచారకురాలగు ఫీబే అను మన సహోదరిని, పరిశుద్ధులకు        తగినట్టుగా ప్రభువు నందు చేర్చుకొని,

         2. ఆమెకు మీవలన కావలసినది ఏదైన ఉన్నయెడల సహాయము చేయవలెనని ఆమెనుగూర్చి     మీకు సిఫారసు చేయుచున్నాను; ఆమె అనేకులకును నాకును సహాయురాలై యుండెను.
         3. క్రీస్తు యేసునందు నా జతపనివారైన ప్రిస్కిల్లకును, ఆకులకును నా వందనములు చెప్పుడి.

         4. వారు నా ప్రాణముకొరకు తమ ప్రాణములను ఇచ్చుటకైనను తెగించిరి. మరియు, వారి         యింట ఉన్న సంఘమునకును వందనములు చెప్పుడి; నేను మాత్రము కాదు అన్యజనులలోని          సంఘములవారందరు వీరికి కృతజ్ఞులై యున్నారు.

5. ఆసియాలో క్రీస్తుకు ప్రథమఫలమైయున్న నా ప్రియుడగు ఏపైననెటుకు వందనములు. 6. మీకొరకు బహుగా ప్రయాసపడిన మరియకు వందనములు.   

7. నాకు బంధువులును నా తోడి ఖైదీలునైన అంద్రొనీకుకును, యూనీయకును వందనములు; వీరు అపొస్తలులలో ప్రసిద్ధి కెక్కినవారై, నాకంటె ముందుగా క్రీస్తునందున్నవారు.

         8. ప్రభువునందు నాకు ప్రియుడగు అంప్లీయతునకు వందనములు.

         9. క్రీస్తునందు మన జత పనివాడగు ఊర్బానుకును నా ప్రియుడగు స్టాకునకును వందనములు.

         10. క్రీస్తు నందు యోగ్యుడైన ఆపెల్లేకు వందనములు. అరిస్టోబులుఇంటివారికి వందనములు.

         11. నా బంధువుడగు హెరోది యోనుకు వందనములు. నార్కిస్సుఇంటి వారిలో   ప్రభువునందున్న వారికి వందనములు.

         12. ప్రభువునందు ప్రయాసపడు త్రుపైనాకును త్రుఫోసాకును వందనములు. ప్రియురాలగు     పెర్సిసునకు వందనములు; ఆమె ప్రభువు నందు బహుగా ప్రయాసపడెను.

         13. ప్రభువునందు ఏర్పరచబడిన రూఫునకు వందనములు; అతని తల్లికి వందనములు; ఆమె       నాకును తల్లి.

         14. అసుంక్రితుకును, ప్లెగో నుకును, హెర్మే కును, పత్రొబకును, హెర్మాకును వారితో కూడనున్న సహోదరులకును వందనములు.

         15. పిలొలొగు కును, యూలియాకును, నేరియకును, అతని సహోదరికిని, ఒలుంపాకును      వారితోకూడ ఉన్న పరిశుద్దులకందరికిని వందనములు.

         16. పవిత్రమైన ముద్దుపెట్టుకొని యొకని కొకడు వందనములు చేయుడి. క్రీస్తుసంఘములన్నియు మీకు వందనములు చెప్పుచున్నవి.

    ఈ మనుషుల జాబితాలో కొన్ని గుంపులు ఉన్నాయి. వాటిని గమనించి క్షుణ్ణంగా ధ్యానిద్దాం,

    దేవుని కుటుంబములో కొందరు ప్రియులైన వారిని పౌలు గుర్తిస్తున్నాడు. 3వ వచనములో ఆకుల, ప్రిస్కిల్ల ఉన్నారు. వారు ప్రియులైన దంపతులు. మీరు బైబిల్లో గమనిస్తే వారిద్దరి పేర్లు ఒకరి పక్కన మరొకరు పేరు తప్పక వ్రాయబడి ఉంటుంది. దాన్ని బట్టి మనకు తెలిసిందేమిటంటే వీరిద్దరు ప్రేమతో నమ్మకమైనజంటగా జీవిస్తూ దేవుని ప్రేమతో ఐక్యతతో ప్రభువును సేవించారు. పౌలులాగా వీరు కూడా డేరాలు కుట్టేవారు. ఆయన క్షేమం, భద్రతో కోసం వారి ప్రాణాలైన అర్పించడానికి వెనుకాడలేదు. 5వ వచనం చూడండి, “ఆసియాలో క్రీస్తుకు ప్రథమఫలమైయున్న నా ప్రియుడగు ఏపైననెటుకు వందనములు.” మనము కొంచెం లోతుగా ఆలోచిస్తే, ఈయన అపోస్తలునికి చాలా ప్రశస్తమైన వాడైయుంటాడు. ఎందుకంటే ఆసియ నుండి అకయకు వచ్చి ఇప్పుడు మొదటి విశ్వాసిగా ప్రధమ ఫలముగా ఉన్నాడు. 8వ వచనం. “ప్రభువునందు నాకు ప్రియుడగు అంప్లీయతు” అని వ్రాయబడింది. 9వ వచనములో స్టాకు తనకు ప్రియుడని చెబుతూ ఉన్నాడు. ఈయన గూర్చి మనకేదీ తెలియదు. 12వ వచనం గమనించండి,  “ప్రియురాలగు పెర్సిసునకు వందనములు; ఆమె ప్రభువు నందు బహుగా ప్రయాసపడెను.” ఇది ఒక స్త్రీ పేరు. ఒకవేళ ఆమె వ్యాపారస్థురాలై ఉండవచ్చు. ప్రభువు కోసం చాలా ప్రయాస పడిఉండవచ్చు. వీరంతా పౌలు భక్తునితో దగ్గరి సంబంధం కలిగినవారు.

         రెండవ గుంపు తోటి పనివారు. మొదటి వచనములో మొదటి పేరు ఉన్నది. ఫీబే. ఆమెను పౌలు భక్తుడు “మన సహోదరి” అని సంబోధిస్తూ ఉన్నాడు. ఆమె ప్రభువు కుటుంబములో సహోదరి. అది శారీరక కుటుంబము కాదు, గాని ప్రభువు కుటుంబము. ఆమె పేరుకు “ప్రకాశించుట” అని అర్ధం. ఆమె కెంక్రేయ అనే ఊల్లోని సంఘములో పరిచారకురాలు. ఈ ఊరు కోరింథు పట్టణానికి ఎంతో దూరములో లేదు. పౌలు ఈ పత్రిక వ్రాసినపుడు కోరింథులో ఉండిఉండవచ్చు. ఆమె యోగ్యురాలు. ఎంత యోగ్యురాలంటే ఆమెకు ఇతరులు సహాయం చేయవలసిఉన్నది. ఇక్కడ మరోసారి ఆకుల ప్రిస్కిల్లలు ఉన్నారు. సహాయకులలో వీరు కూడా ఒకరు. అపోల్లో ఎఫేసికి వచ్చినపుడు ఆయనకు క్రీస్తు మార్గమును వీరే లోతుగా బోధించారు. వీరిద్దరు పౌలుభక్తునికి జతపనివారు. 6వ వచనములో మరియ కనిపిస్తున్నది. ఆమె “బహుగా ప్రయాస” పడిందని చెబుతున్నాడు. ఆమె ఏ రీతిగా ప్రయాస పడిందో మనకు తెలియదు. ఆమెకు ఆతిధ్యమిచ్చే వరముండవచ్చు, వారి ఊళ్ళో ఉన్నపుడు పౌలు భక్తునికి ఆతిధ్యమిచ్చిఉండాలి.  12వ వచనములో త్రుపైనా, త్రుఫోసా అనే సహోదరీలు ఉన్నారు. వారు కూడా నమ్మకమైనపనివారే!

         పౌలు తన జతపనివారిని మెచ్చుకుంటున్నాడు. తాను వంటరిగా లేడని, వారినిబట్టి బలము కలిగిందని మెచ్చుకుంటున్నాడు. పౌలు వంటరివాడు కాదనే సంగతి మనము క్షుణ్ణంగా గ్రహించాలి. ఆయనతో కలిసి పనిచేసినవారు ఉన్నారు. కాబట్టి తన పరిచర్య, పనిలో వారు చూపిన శ్రద్ధ ఆసక్తినిబట్టి వారిని మెచ్చుకొని కృతజ్ఞత చూపుతున్నాడు.

         దేవుని కుటుంబములో మూడవ గుంపు సంఘములు. మొదటిగా కెంక్రేయ లోని సంఘము విషయం వ్రాశాడు. ఆ సంఘములో ఫీబే సేవకురాలు, సహోదరి. ఈ ఊరు కోరింథు పట్టణానికి 10/12 కిలోమీటర్ల దూరమే. ఆయన కోరింథీ పట్టణములో పరిచర్య చేసిన సమయములో ఈ సంఘము స్థాపించబడి ఉండాలి. అ.కా. గ్రంధములో చూస్తే పౌలు కోరింథీలో ఒకటిన్నర సంవత్సరాలు పరిచర్య చేసినట్టు, అ తరువాత కూడ మరి కొంత కాలం అక్కడ గడిపినట్టు అర్థమవుతుంది. కోరింథీయులు కొందరు తూర్పు తీరములో ఉండే కెంక్రేయకు వెళ్ళిఉండాలి. అ.కా. 18:18 లో పౌలు ఎఫెసు వెళ్తూ అక్కడ ఆగినట్టు ఉన్నది. ఆయన కోరింథీని దాటి వెళ్తున్నపుడు అక్కడ ఆగి, ఆ సంఘములో పరిచర్య చేశాడు. 4వ వచనములో “అన్యజనులలోని సంఘముల” ప్రస్తావన ఉన్నది. ఆపో. పౌలు అన్యజనులకు అపోస్తలుడు అనే విషయాన్ని బాగా గుర్తు పెట్టుకోవాలి. తనగురించి అలాగే చెప్పుకున్నాడు, అలాగే పిలుచుకున్నాడు కూడా! ఆయన చిన్న ఆసియా ప్రాంతము గుండా గ్రీసు వెళ్ళి అ రోమా సామ్రాజ్యమంతట సంచరించి, మొదట యూదులకు, తరువాత యూదేతరులకు సువార్తను  అందించి, సంఘాలు స్థాపించాడు. ఇక్కడ పౌలు భక్తు అన్యజనులలోని సంఘములవారందరు ఆకుల ప్రిస్కిల్లకు కృతజ్ఞతలు చెబుతున్నారని వ్రాశాడు. 5వ వచనములో వారింట్లో ఉన్న సంఘము గూర్చి ఉన్నది. ఇలాటి ఇంటిసంఘాలు రోమా సామ్రాజ్యములో చాలా ఉండేవి. రోమ్ పట్టణం చాలా పెద్దది, అక్కడ ఎన్నో ఇంటి సంఘాలు ఉండిఉండాలి. ఆకుల ప్రిస్కిల్ల, విశ్వాసుల సహవాసముకోసము వారింటిని తెరిచారు. 15వ వచనములో కొందరు పరిశుద్ధులగురించి ప్రస్తావిస్తున్నాడు. వారు పిలొలొగు, యూలియా, నేరియ, అతని సహోదరిక, ఒలుంపా. వారితో ఉన్న పరిశుద్ధులు. ఒకవేళ వారి ఇంటిలో మరో ఇంటిసంఘము ఉండవచ్చు. 16వ వచనము. క్రీస్తు సంఘములన్నీ, అనగా దేవుని సంఘములన్నీ వందనములు చెబుతూఉన్నాయి. రోమా సామ్రాజ్యమంతట ఆయన సంఘాలు స్థాపించాడు, వారే క్రీస్తు సంఘములంటే! రోమ్ పట్టణం  పశ్చిమభాగాన ఈ ఊరు ఉన్నది. అది సువార్త అందిన ప్రాoతానికి సరిహద్దులో ఉన్నది. ఈ విధంగా పౌలు తన జతపనివారు, స్నేహితులకు వందనాలు చెప్పి, వారిని త్వరలో చూస్తాననే నిరీక్షణతో ఉన్నాడు. 27గురి పేర్లు ఉన్నవి. వీరంతా దేవుని కుటుంబo. వారి గురించి ఎంతో సంతోషముతో వారు నిజమైన విశ్వాసులని నమ్మి వారికి శుభములు, వందనములు చెప్పాడు. దేవుని విశాలమైన కుటుంబములోని నిజమైన సహోదర, సహోదరీలకు సరియైన రీతిగా స్పందించాడు. మన సంఘాల్లో ఇలాటి ప్రేమ ఉండేలా ప్రభువే స్వయంగా మనకందరికీ సహాయము చేయుగాక! అమెన్!!