I కొరింథీ అధ్యయనం-30 10:1-13~ (2) విజయమును సంపాదించుకోవడం-2వ భాగము

 

I కొరింథీ అధ్యయనం-30   10:1-13~ (2)

విజయమును సంపాదించుకోవడం-2

 

      హల్లెలూయ! మీచుట్టూరా మిమ్మల్ని వేధించే వాళ్ళున్నా, మీ ఆరోగ్యం సరిగా లేకపొయినా, ఆర్థికసమస్యలు బాధ పెడుతున్నా, మనశ్శాంతి లేక గందరగోళంగా ఉన్నా, దేవునికి స్తోత్రం చెప్పండి, నాతో బాటు, బిగ్గరగా హల్లెలూయ అని మనసారా, “సజీవుడైన దేవుడు యేసు క్రీస్తు ప్రభువునకు స్తోత్రం, మహిమ ఘనత కలుగునుగాక!” అని చెప్పండి! మీరు దేవుని చిత్తమును చేయాలనుకుoటున్నారా?  Iధెస్స. 5:16 “ప్రతి విషయమునందును కృతజ్ఞతాస్తుతులు చెల్లించుడి. ఈలాగు చేయుట యేసుక్రీస్తునందు మీ విషయములో దేవుని చిత్తము.” అవును, ఆయనకు కృతజ్ఞతలు చెల్లిద్దాo, తలలు వంచండి, ప్రార్థన:
    ఈ నాటి లేఖన భాగము I కోరింథీ 10:1-13. అంశం: విజయమును సంపాదించుకోవడం. విజయమంటే ఇష్టపడనివారుండరు. కానీ పొందేలేమేమో అనే అనుమానమునుబట్టి ప్రయత్నాలు గట్టిగా చేయరు. విజయమును సంపాదించుకోవడానికి అవసరమైన పాఠాలు గతించిన అధ్యయనములో ఇప్పటికే రెండు పాఠాలు ధ్యానించాము. ఒకటి, మన చుట్టున్న పరిస్థితులను అంచనా వేయడం. మీ గురించి, మీ కుటుంబము గురించి మీకు క్షుణ్ణంగా తెలుసుకొని ఉండాలి. కుటుంబపు ప్రభావం మనమీద చాలా ఉంటుంది. మన నేపధ్యాన్ని పరీక్షించుకోవడం అవసరం. మన నేపధ్యపు ప్రభావం మన మీద ఉంటుంది. కానీ దాన్ని అధిగమించడం సాధ్యమే. దేవునినెరుగని వారు సహితం వారి నేపధ్యాన్ని దాటుకొని ఎంతో ఉన్నత శిఖరాలనెక్కారు. దేవుని కలిగిన మనము నేఫధ్యము దోహదకారిగా ఉన్నా, లేకపొయినా, సహాయకారిగా ఉన్నా, లేకపోయినా, విజయము సంపాదించుకోగలము. ఒక త్రాగుబోతు కుమారుడు అయినంత మాత్రాన అదే బాటలో నడవవలసిన అవసరం లేదు. విగ్రహారాధకుల కుటుంబములోనుండి వచ్చినంత మాత్రాన మీరు కూడా అలాగే జీవించవలసిన అవసరం లేదు. అవును, విశ్వాసమువలన, దేవుని కృప చేత విజయం సాధ్యమే! ఎర్రసముద్రపు సన్నివేశంలో ప్రభువు కలుగచేసుకున్నట్టు, ఇశ్రాయేలీయుల జీవితాల్లో జోక్యం చేసుకున్నట్టు, మన జీవితాల్లో కూడా చేయగల సజీవుడు, సమర్థుడు. ముదడుగు వేయడానికి నీవు సిద్ధమా? రెండవ పాఠము, సహవాసాలు, సాంగత్యాలు, స్నేహాలు. ఈ పాఠము చాలా ప్రాముఖ్యమైనది. ఇది పరిస్థితులు, నేపధ్యము కాదుగానీ మన స్వంత నిర్ణయాలమీద ఆధారపడి ఉంటుంది. నీ స్నేహాలు ఎవరితో ఉన్నాయి? నీ తోటివారెవరు? విశ్వాసులా? అవిశ్వాసులా? దుష్టులా? ప్రభువుతో నడుస్తున్నవారా? దేవుని వాక్యమును ప్రాణముకంటే ఎక్కువగా ప్రేమించేవారా? పేరుకు మాత్రమే దేవుని వాక్యమును పట్టుకునే “విశ్వాసులా”? ఒక అద్భుతమైన సామెత ఉన్నది. “మీ స్నేహితులెవరో చెప్పండి, అప్పుడు మేరేలాంటి వారో చెప్తాను.” మన స్నేహాలు, సహవాసాలు చెడ్డవైతే, మీరు విజయము సంపాదించా లనుకుకోవడం గొంతెమ్మ కోరిక అవుతుంది. పరిశుద్ధ గ్రంధములోని కొన్ని మాటలు మీ మనసుల్లో నాటాలని వాటిని మీ ముందుచుతున్నాను. 6వ వచనములో “చెడ్డవాటిని ఆశించకుండునట్లు” అనే మాటలు, 7వ వచనములో  “విగ్రహారాధకులై ఉండకుడి”  అనే మాటలు: 8వ వచనములో “వారివలె వ్యభిచరించకయుందము” అనే మాటలు, 9వ వచనములో “మనము ప్రభువును శోధింపకయుందము” అనే మాటలు, 10వ వచనములో “మీరు సణుగకుడి” అనే మాటలు జాగ్రతగా గమనించి మీ బైబిల్లో అండర్లైన్ చేసుకొని కంఠస్థం చేయాలని మీకు మనవి చేస్తూ ఉన్నాను. గతమంతటినీ ప్రక్కకు పెట్టి ఇప్పటినుండి మీ స్నేహాలు, సాంగత్యాలు, సహవాసాలు పరిశుద్ధమైన సంఘముతో నిజమైన విశ్వాసులతో మీలాగా విజయము సంపాదించుకోవాలనే ఆశ ఉన్న వారితో చేయండి. ఒక ప్రార్ధనగుంపుగా ఏర్పడి ప్రార్థన, బైబిల్ పఠన, ప్రోత్సాహం కలిగించే సహవాసములో సమయము గడపండి. ఒకరికొకరు ధైర్యము, ప్రోత్సాహము, ఇచ్చిపుచ్చుకొనే బైబిల్ సహవాసముగా ఏర్పడండి. ప్రభువు మీ మార్గమును మరల్చి మిమ్మల్ని తన మార్గములో నడిపిస్తాడు.
    ఇక మూడవ పాఠము ఈ పూట విపులంగా అధ్యయనం చేద్దాం. 11-13 వచనాలు 

I కోరింథీ 10:11-13 “11ఈ సంగతులు దృష్టాంతములుగా వారికి సంభవించి, యుగాంతమందున్న మనకు బుద్ధి కలుగుటకై వ్రాయ బడెను.౹ 12తాను నిలుచుచున్నానని తలంచుకొనువాడు పడకుండునట్లు జాగ్రత్తగా చూచుకొనవలెను.౹ 13సాధారణముగా మనుష్యులకు కలుగు శోధనతప్ప మరి ఏదియు మీకు సంభవింపలేదు. దేవుడు నమ్మదగినవాడు; మీరు సహింపగలిగినంతకంటే ఎక్కువగా ఆయన మిమ్మును శోధింపబడనియ్యడు. అంతేకాదు, సహింపగలుగుటకు ఆయన శోధనతోకూడ తప్పించుకొను మార్గమును కలుగ జేయును.”  
    విజయము సంపాదించుకోవాలంటే నేర్చుకోవలసిన మూడవ పాఠము ధృడమైన నిశ్చయత. ప్రియశ్రోతలూ, మీకు తెలిసినదానిని హృదయములో మననం చేయండి, మళ్ళీ, మళ్ళీ తలపోసుకొనండి. జ్ఞాపకం చేసుకొనండి, చరిత్ర, ప్రత్యేకించి బైబిల్లోని దేవుని ప్రజల చరిత్ర, మనకు బుద్ధి చెప్పడం కోసం వ్రాయబడింది. దానితో సుపరిచితులు కావాలి. జాగ్రతగా మళ్ళీ మళ్ళీ ఆ భాగాలు చదవండి. దాని మీద లోతుగా ధ్యానించండి. అవి ఎక్కువగా పాత నిబంధనలోని గ్రంధాల్లో ఉన్నాయి. “నీకు తెలియనిది నిన్ను బాధపెట్టదు” అని కొందరు అంటూ ఉంటారు. కానీ, ప్రియ సోదరుడా, సోదరీ, సత్యమేమిటో మీకు తెలుసా? మీకు తెలియనిది మిమ్మల్ని బాధ పెట్టగలదు. గతములో జరిగినవాటిని క్షుణ్ణంగా అధ్యయనం చేసి వాటిని బాగా గ్రహించాలి. యూదులకు ఒక నినాదం ఉన్నది. అదేమిటి? మీరు మీ గతమును మర్చిపోతే మీ భవిష్యత్తును ప్రణాళిక వేయలేరు.”  అంచేత మనకు తెలియనిది మనకు కీడు చేస్తుందని, నష్టం కలిగిస్తుందని మనమంతా, మనలో ప్రతి ఒక్కరూ, ఒక్కొక్కరూ తెలిసుకోవలసిన అవసరత చాలా ఉన్నది.
    మీ ఆత్మాభిమానాన్ని కాస్త అదుపులో ఉంచుకొనండి. భ్రమలో జీవించకండి. లేఖనమేమి సెలవిస్తుంది? 12వ వచనం. “తాను నిలుచుచున్నానని తలంచుకొనువాడు పడకుండునట్లు జాగ్రత్తగా చూచుకొనవలెను”  పడిపోయేది ఎప్పుడంటే, “నేను పడిపోనులే’ అనుకున్నప్పుడు. ఆత్మాభి మానమును గూర్చి చెప్పేవారేమంటున్నారు? “నేనే నంబర్ వన్” అని నీకు నీవు చెప్పుకుంటూ ఉండు, అని అంటారు. నేనేమంటానంటే, “నేనే నెంబర్ వన్” అని చెప్పుకోవద్దు. “యేసయ్య నెంబర్ వన్” “ఆయనే నెంబర్ వన్” అని చెప్పుకుంటూ ఉండు. ఎల్లప్పుడూ ఆయనే నెంబర్ వన్! హల్లెలూయ! ఆయన గురించే ఆలోచిస్తూ ఉండు. లేకపోతే, నీమీద నీవు ఆధారపడితే, పడిపోతావు, జాగ్రత! నీ స్వంత తలంపులే నిన్ను పడవేయగలవు. ఆత్మాభిమానమును ఆశ్రయించిన ఎందరో ఇప్పటికే పడిపోయారు. దుష్టత్వము ముందు మీరు స్వంతగా నిలబడలేరు, ఎందుకంటే అది ఎల్లప్పుడూ మీ ప్రక్కనే ఉంటుoది.
    గమనించండి, దేవుని వద్ద మార్గమున్నది. అదేమిటి? 13వ వచనం. “సాధారణముగా మనుష్యులకు కలుగు శోధనతప్ప మరి ఏదియు మీకు సంభవింపలేదు. దేవుడు నమ్మదగినవాడు; మీరు సహింపగలిగినంతకంటె ఎక్కువగా ఆయన మిమ్మును శోధింపబడ నియ్యడు. అంతేకాదు, సహింప గలుగుటకు ఆయన శోధనతోకూడ తప్పించుకొను మార్గమును కలుగ జేయును.”  ప్రియ సోదరీ, సోదరులారా, ఎన్నో మార్గాలు లేవు. నిజం చెప్పాలంటే, రెండే ఉన్నవి. మీ మార్గం లేదా ప్రభువు మార్గం. ఆయన మార్గం ఏర్పాటు చేస్తానని వాగ్దానం చేశాడు. ప్రభువే మార్గం ఏర్పాటు చేస్తాడని సంపూర్ణంగా ధృడంగా నమ్మండి. “ “సాధారణముగా మనుష్యులకు కలుగు శోధనతప్ప”  అనే మాటలు గమనించండి.  మానవులoదరికి కలిగే సాధారణమైన శోధనే మీకు కూడా కలుగుతున్నది. ఇవి మానవులందరికీ కలిగేవే! క్రొత్తవేమీ కావు. దేవదూతలకు కలిగే శోధనలేమీ ఉండవు, అలాంటివి ఉండవు. “నన్నెవరూ అర్ధం చేసుకోవడం లేదు” అని ఎన్నడూ అనుకోవద్దు. ప్రస్తుతం మీరెదుర్కుంటున్న శోధన ప్రతి మానవుడు ఎదుర్కొన్నదే! మనము పడిపోతే అది దేవుని తప్పు కాదు. నీవెదుర్కుంటున్న శోధన ప్రభువునకు బాగా తెలుసు. ఎంత ఒత్తిడి శోధన ద్వారా కలుగుతుందో ప్రభువుకు బాగా తెలుసు. ఆయన నిన్ను అర్ధం చేసుకుంటున్నాడు. దేవునికి బాగా తెలుసు, హల్లెలూయ!

        ఒక గొప్ప బైబిల్ పండితుని హెచ్చరికను స్వీకరించుదాం. తన ప్రజలు ఎంతటి శోధనను ఎదుర్కొనగలరో, ఏది ఏ విధంగా తన ప్రజలను ప్రభావితం చేస్తుందో, దేవునికిబాగా తెలుసు. ప్రతి శోధనను వారి శక్తికి తగ్గట్టుగా మారుస్తూ ఉంటాడు. వారికి ఆయన నిర్ణయించిన శోధనలను జయించే శక్తినిస్తాడు. ఈ వాగ్దానము కేవలం కోరింథీ క్రైస్తవ విశ్వాసులకు మాత్రమే కాదు, అందరికీ వర్తిస్తుంది. ఇది మేలు కలిగించే వాగ్దానము. ఈ పరిస్థితులలో ఉన్న ప్రతి ఒక్కొక్కరికీ అదే మేలు చేస్తుంది. కాబట్టి శోధన, పరీక్షలు ఎదుర్కుంటున్న వారికి ధైర్యం, ప్రోత్సాహం ఇవ్వటానికి ఈ వాగ్దానము శ్రేష్టమైన ఆధారము. ప్రభువు వారి శోధనల్లో వారిని నిలబెడతాడు. ఎంత కఠినమైన పరీక్ష అయినా, ఎంత కాలము ఎదుర్కుంటున్నా, ఎంత బలహీనంగా వారు ఫీలవుతున్నా, శోధనలు, పరీక్షలు అనుమతించిన దేవునికి వారిని బలపరచడానికి శక్తిగలవాడు. అందుచేత పరిస్థితి అంతటినీ ప్రభువు సన్నిధిలో ఉంచి, ఆయన సంరక్షణకు అప్పగించుకోవచ్చు.  కాబట్టి, ప్రియ శ్రోతలూ, విజయమును సంపాదించుకోవడానికి ఈ మూడు పాఠాలు మనము నేర్చుకోవాలి.
1.    మన చుట్టూ ఉన్న పరిస్థితులను అంచనా వేయడం. మన నేపధ్యములో ఉన్న మంచివి ఏవో పరీక్షించి వాటి మీద కట్టుకోవడం. ఏ నేపధ్యం అయినా, దేవుని వద్దనుండి కృపను పొంది, పరిస్థితులను మలచుకోవడం.
2.    మన సహవాసాలు, స్నేహాలు, సాంగత్యాలను నిర్దేశించే పాఠము విజయమును సంపాదించుకోవాలనే ఆశ కలిగిన వారితో మంచి స్నేహాలను ఏర్పాటు చేసుకోవడం.
3.    ధృడమైన నిశ్చయత కలిగి ఉండాల్సిన పాఠము. దేవుడు ఏర్పాటు చేసిన తప్పించుకునే మార్గము సరియైనది, మన స్వంత మార్గము కాదు.

I కొరింథీ అధ్యయనం-29 10:1-13~(1) విజయమును సంపాదించుకోవడం-మొదటి భాగము

 I కొరింథీ అధ్యయనం-29   10:1-13~(1)

              విజయమును సంపాదించుకోవడం-మొదటి భాగము
    జీవితమంటే ఒక కొండ ఎక్కినట్టే! ఎంతో కష్టతరంగా ఉంటుంది. ఎదురీదుతూనే ఉండాలి. కొంచెముసేపు అదమరచినా మునిగిపోవచ్చు. జీవితం ఎల్లప్పుడూ పోరాటమే! దానికితోడు మన ఆరోగ్య  సమస్యలు ఉండనే ఉంటాయి.  కొందరికి భయము, ఆందోళన ఎక్కువ. మరికొందరికి ఆర్ధిక సమస్యలు. మాసం చివరికిరాకముందే చేతులో డబ్బు అయిపోతుంది. ఇంకా కొందరికి ఇరుగుపొరుగు వారితో సమస్యలు. వారు మనతో సహకరించరు. మరి కొందరికి కుటుంబస్థులు, బంధువులు, హాస్పిటల్లో ఉండవచ్చు. ఈ సమస్యలతో ఎలా జీవిస్తాం? అవును, శ్రోతలూ, జీవితం కష్టతరంగా ఉంటున్న విషయం మీరు వ్యక్తిగతంగా అనుభవిస్తూ ఉన్నారేమో! కొందరు ఉత్సాహపరిచే సందేశాలిచ్చేవారు అన్ని ప్రశ్నలకు “రెడీమేడ్” సమాధాన్నలున్నట్టు బుకాయిస్తూ ఉంటారు. వారి జవాబులు మనకు సహాయం చేయలేకపోయినపుడు మీరు మానసిక వైద్యుని దగ్గరికి వెళ్ళండి, అని ఉచిత సలహా ఇస్తూ ఉంటారు.   

    రండి, ఈ పూట మనమున్న మన పరిస్థితులలో విజయమును ఎలా సంపాదించుకోగలమో అధ్యయనం చేద్దాం, రేడియోకు దగ్గరగా వచ్చి కూర్చోండి. సావధానంగా వినండి. వారిలాగా ఏదో ఒకటికాదుగాని, దేవుని పరిశుద్ధ గ్రంధములోనుండి మీరు, నేను ఎదుర్కుంటున్న పరిస్థితులలోనే ఎలా విజయము సంపాదించుకోగలమో ధ్యానించుదాము. I కోరింథీ 10:1-13 వచనాల్లోనుండి పరిశుద్ధాత్ముడు మనతో ఏమి బోధిస్తున్నాడో జాగ్రతగా నేర్చుకుందాం.
    మనమంతా క్రైస్తవ జీవితములో విజయమును సంపాదించుకోవడానికి ఆపో. పౌలు మూడు పాఠాలు నేర్పిస్తున్నాడు. మొదటి పాఠము, నీ చుట్టున్న పరిస్థితులను అంచనా వేయడం అనే పాఠం. మొదటి 5 వచనాలు: “1సహోదరులారా, యీ సంగతి మీకు తెలియకుండుట నాకిష్టములేదు. అదేదనగా, మన పితరులందరు మేఘముక్రింద నుండిరి. వారందరును సముద్రములో నడచిపోయిరి;౹ 2అందరును మోషేనుబట్టి మేఘములోను సముద్రములోను బాప్తిస్మము పొందిరి;౹ 3అందరు ఆత్మ సంబంధమైన ఒకే ఆహారమును భుజించిరి;౹ 4అందరు ఆత్మ సంబంధమైన ఒకే పానీయమును పానము చేసిరి. ఏలయనగా తమ్మును వెంబడించిన ఆత్మసంబంధమైన బండలోనిది త్రాగిరి; ఆ బండ క్రీస్తే.౹ 5అయితే వారిలో ఎక్కువ మంది దేవునికిష్టులుగా ఉండకపోయిరి గనుక అరణ్యములో సంహరింపబడిరి. ఇశ్రాయేలు చరిత్రలో ఒక క్లిష్ట పరిస్థితిని ఆపో. పౌలు పరీక్షిస్తున్నాడు. అది ఎర్ర సముద్రపు సన్నివేశం. ఇశ్రాయేలీయులు ఐగుప్తునుండి విమోచించబడుతున్నారు. వారి వెనుక ఫరో తన బలమైన సైన్యంతో వెంటాడుతూ  ఉన్నాడు. వారికి ముందు లోతైన ఎర్ర సముద్రం ఉన్నది. వారా సమయంలో ముందుకు వెళ్లలేరు, వెనుకకు మళ్లలేరు. అది అప్పటి జీవిత పోరాటం. కానీ దేవుడు మోషే ద్వారా వారిని సముద్రములో గుండా నడిపించాడు. దేవుని మేఘపు భద్రతలో వారు సముద్రము మధ్యలోనే ఆరిన నేలమీద నడిచివెళ్ళారని లేఖనం సెలవిస్తుంది. సముద్రమును రెండు పాయలుగా చేసి దేవుడు వారిని విడిపించాడు. వారి కుడిప్రక్కన, ఎడమప్రక్కన నీళ్ళు గోడలాగా ఉన్నాయి. ఈ అనుభవమంతా ఒక మహా అద్భుతం! దేవుడు తన ప్రజలపక్షంగా అద్భుతరీతిగా వారి పరిస్థితులలో కలుగచేసుకున్నాడు, జోక్యం చేసుకున్నాడు.
    ప్రియ సోదరీ, సోదరుడా, నీ జీవితపు పరిస్థితి ఏమిటి? ప్రభువు నీ జీవితములో ఎప్పుడైనా కలుగచేసుకున్నాడా? నీ జీవితమంతటినీ తలపోసుకొని చూడు. తీరిగ్గా కూర్చొని ఆలోచించు.
    ఆ తరువాత సీనాయి ప్రాంతంలో వారు ప్రయాణం చేస్తున్నపుడు ప్రభువు వారిని ఎలా భద్రపరిచాడో పౌలు పరీక్షిస్తున్నాడు. ఆహారము లేదు, నీరు లేదు. దేవుడు వారికి ప్రతి ఉదయం మన్నా ను ఇచ్చి పోషించాడు. అరవరోజు రెండురోజులకు సరిపడ ఆహారము దొరికేది. వారికి నీరు లేనప్పుడు బండను కొట్టమని ప్రభువు మోషేకు ఆజ్ఞాపించాడు. బండలో నుండి నీరు పెల్లుబుకింది. వింటున్నారా, శ్రోతలూ? బండలోనుండి నీటి ప్రవాహము! ఎంత ఆశ్చర్యం, ఎంత అద్భుతం! లేఖనము సెలవిస్తున్నట్టుగా ఆ బండ వారిని వెంబడించాడు, ఆయన యేసు క్రీస్తు ప్రభువు, హల్లెలూయ! నీవు యేసు క్రీస్తునందు నిజముగా ఇప్పుడు నమ్ముకుంటున్న వ్యక్తివి, అయితే ప్రభువు నిన్ను వెంబడిస్తున్నాడు.
    అయినప్పటికీ, దేవుడు వారినిబట్టి దుఃఖపడ్డాడు. ఎందుకు? వారి విశ్వాసము క్రియలలో కనిపించలేదు. అందుచేత ప్రభువు వారిని త్రోసివేశాడు. అందుచేత, ప్రియ సోదరీ, సోదరుడా, నిన్ను నీవు జాగ్రత్తగా పరీక్షించుకోమని హెచ్చరిస్తున్నాను. నీ జీవితపు నేపధ్యం ఏమిటో గమనించిచూడు. నీ గతం పరిశుద్ధమైనది కాకపోవచ్చు. అయినా ఫర్వాలేదు. అరణ్యములో మరణించిన ఆ యూదులకు కూడా అంత మంచి నేఫధ్యం కాదు. మీ నేఫధ్యం ఏదైనా సరే, విజయము సంపాదించాలంటే, జాగ్రత్తగా నీ పరిస్థితిని అంచనా వేసుకోవాలి. మీ తల్లితండ్రులు, బంధువులు, స్నేహితులు, ఇరుగుపొరుగువారు మీ విశ్వాసానికి దోహదకరంగా ఉండవచ్చు, ఉండకపోవచ్చు. కొన్ని కుటుంబాల్లో తల్లితండ్రులు, తాతలు, అమ్మలు, నాన్నమ్మలు బలమైన విశ్వాసులు, ప్రార్థన పరులు అయిఉండవచ్చు, మరి కొందరికి కాకపోవచ్చు. ఎవరిమీద ఆధారపడకుండా దేవుని వాక్యమే, మీ చేతిలోని పరిశుద్ధ గ్రంధమే మీకు చుక్కానిగా, మీలో నివసిస్తున్న యేసుక్రీస్తు ప్రభువు, పరిశుద్ధాత్ముని స్వరమును వింటూ శోధనలను జయించి ముందుకు సాగిపోదాం. మీ వ్యక్తిగత విశ్వాసం అత్యంత ప్రాముఖ్యమైనది. దాన్ని కాపాడుకొనండి. మీ సాక్ష్యం అన్నింటికంటే విలువైనది, దాన్ని మలినము, మచ్చ, లేని స్వచ్చమైనదిగా చేసుకొనండి.
     రెండవ పాఠము సహవాసము, సాంగత్యము అనే పాఠము. 6-10 వచనాలు: “6వారు ఆశించిన ప్రకారము మనము చెడ్డవాటిని ఆశించకుండునట్లు ఈ సంగతులు మనకు దృష్టాంతములుగా ఉన్నవి.7–జనులు తినుటకును త్రాగుటకును కూర్చుండి, ఆడుటకు లేచిరి అని వ్రాయబడినట్లు వారిలో కొందరివలె మీరు విగ్రహారాధకులై యుండకుడి.౹ 8మరియు వారివలె మనము వ్యభిచరింపక యుందము; వారిలో కొందరు వ్యభిచరించినందున ఒక్కదినముననే యిరువది మూడువేలమంది కూలిరి.౹ 9మనము ప్రభువును శోధింపక యుందము; వారిలో కొందరు శోధించి సర్పములవలన నశించిరి.౹ 10మీరు సణుగ కుడి; వారిలో కొందరు సణిగి సంహారకునిచేత నశించిరి.౹”  ఈ భాగములో సాంగత్యము, సహవాసము చేసే 5 విషయాలు ఉన్నవి. జాగ్రత్తగా వింటున్నారా, శ్రోతలూ? ఇవి విలాసవంతమైనవి కావు. ఆకర్షించేవి కావు, కానీ అవి చాలా దుర్మార్గమైనవి. 1) దురాశ లేదా అత్యాశ. వారు ఆశించినట్లు చెడ్డవాటిని ఆశించకండి. ఉన్నదున్నట్టు చెప్పాలంటే, మనకిది పుట్టుకతోనే వచ్చింది. హవ్వ, ఆదాములు తోటలో పాపము చేసినప్పటినుండి మనకు జన్మతోనే దుష్టత్వము మీద దురాశ ఉన్నది. దానిని అదుపులో ఉంచుకోవాలి, హద్దులు దాటనీయకూడదు. 2) పౌలు విగ్రహారాధకులు కావద్దని హెచ్చరిస్తున్నాడు. విగ్రహారాధనతో, విగ్రహారాధకులతో పొత్తులు పెట్టుకోవద్దు. మీకు మీరు కనిపించని ఏ విగ్రహాన్ని హృదయములో పెట్టుకోకండి. అది ఏదైనా సరే, దేవునికి మీకు అడ్డుగా వచ్చేదెదైనా అది విగ్రహమే! 3)వ్యభిచరించవద్దు. ఇశ్రాయేలీయులు ఐగుప్తు నుండి కానానుకు ప్రయాణం చేస్తున్నపుడు విగ్రహారాధన చేసే మోయాబీయులతో కలిసిపోయారు. దేవుడు నిశ్చయంగా వారితో కలవవద్దని హెచ్చరించాడు. కానీ ఏది చేయవద్దని ప్రభువు చెప్పారో, అదే వారు చేశారు. వ్యభిచారములో మునిగిపోయారు. 4)ప్రభువును పరీక్షించవద్దు. కొందరు, దేవుడు నిజముగా దేవుడైతే ఇది చేయాలి, అది చేయాలి, అంటూ ఉంటారు. ఇది అవిశ్వాసులకు నిశ్చయమైన ఉదాహరణ. సాతానును వెంబడించే వారు ఇది చేస్తూ ఉంటారు. దీన్ని విడిచిపెట్టండి. 5)సణుగుకోవద్దు. ఇశ్రాయేలీయులు సణుక్కుంటూ జీవించేవారు, ఇక్కడ ఉండేబదులు  ఐగుప్తులో ఎంత బాగుండు. ఇది ఇలా ఉంటే ఎంత బాగుండు, అది అలా ఉంటే ఎంత బాగుండు. వీటన్నిటినీ చేయడం ఖచ్చితంగా విడిచిపెట్టండి. మంచి సహవాసము, సాంగత్యము దుష్టత్వముతో స్నేహము చేయదు. ఈ 5 సాంగత్యములు, స్నేహములు, సహవాసములు ఏ మాత్రము మీ జీవితాల్లో ఉండకుండా చూసుకొనండి. మంచి పళ్ళ గంపలో ఒక్క కుళ్లిపోయిన పండు ఉన్నా మిగిలినవన్నీ కుళ్లిపోవడానికి ఆ ఒక్కటి కారణమవుతుంది”. కానీ మంచి పళ్ళు కుళ్ళిపోయిన పళ్లను బాగుచేయలేవు. కుళ్ళిపోయినవే మంచివాటినికూడా కుళ్లిపోయేటట్టు చేస్తాయి. I కోరింథీ 15:33లో ఆపో. పౌలు ఇచ్చిన దృఢమైన హెచ్చరిక గమనించండి: “33మోసపోకుడి. దుష్టసాంగత్యము మంచి నడవడిని చెరు పును.౹”  ప్రియ సోదరీ, సోదరుడా, నిన్ను నీ జీవితములోని పరిస్థితులని తీరికగా కూర్చొని, తలపోసుకొని, దేవుని వాక్యపు వెలుగులో అవసరమైన ప్రతి మార్పు చేసుకోవడానికి ప్రభువు కృప ఎంతో అవసరము.  ప్రార్ధన:

I కొరింథీ అధ్యయనం-28 9:19-27 జయించడమెలాగు ? (రెండవ భాగము)

 I కొరింథీ అధ్యయనం-28   9:19-27

జయించడమెలాగు ? (రెండవ భాగము)

    రేడియో వద్ద కూర్చొన్న ప్రతి ఒక్కరికీ, ఒక్కొక్కరికీ యేసు క్రీస్తు ప్రభువు శుభకరమైన నామములో శుభములు! మీరు బాగున్నారా? మీరే స్థితిలో ఉన్నారో, మన సృష్టికర్త యేసు క్రీస్తు ప్రభువునకు బాగా తెలుసు. ఆత్మహత్య విషయం ఆలోచిస్తున్నారా? ఆగండి! నిరాశలో కూరుకుపోయిన మీ మనసుకు ఉపశమనం కలిగించే శక్తి యేసు క్రీస్తు ప్రభువునకు సమృద్ధిగా ఉన్నది. ఆయనకు నిరీక్షణ కర్త అని పేరు. రోమా. 15:13 “కాగా మీరు పరిశుద్ధాత్మశక్తి పొంది, విస్తారముగా నిరీక్షణ గలవారగుటకు నిరీక్షణకర్తయగు దేవుడు విశ్వాసము ద్వారా సమస్తానందముతోను సమాధానముతోను మిమ్మును నింపునుగాక.” నిరీక్షణకర్తయగు దేవుడు” అనే మాటలు సావధానంగా అలకించండి. అవును, మీలో నిరీక్షణను ఇప్పుడే కలిగించగల శక్తిమంతుడు. ప్రార్ధించుకుందాం, తలలు వంచండి. ప్రార్థన:
    “జయించడమేలాగు?” అనే అంశమును  I కోరింథీ 9:19-27 ఆధారంగా అధ్యయనము చేస్తున్నాము కదూ! రండి రేడియోకు దగ్గరాగ్గా వచ్చి కూర్చోండి, రాలేనివారు మీరున్నచోటనే సావ ధానంగా అలకించండి. పోటీలలో పాల్గొనే వారితో క్రైస్తవ విశ్వాస జీవితము పోల్చబడుతున్నది. శక్తినంతా కూడగట్టుకొని పోరాటానికి వారు సిద్ధపడుతూ ఉంటారు. వారి గురి మెడల్ సాధించడమే! బహుమానము చేత పట్టుకోవడమే! మీరు నేను, మన విశ్వాస జీవితములో బహుమానము సాధించడానికే నిర్ణయించ బడ్డాము. బహుమానము పొందడానికే మనము పరుగెత్తాలి. మన ప్రభువు, విమోచకుడు యేసు క్రీస్తు ప్రభువు మనతో ఉన్నాడు. మీరే స్థితిలో ఉన్నా, ఎంత దిగజారిపోయినా, యేసయ్య మిమ్ములను బలపరచగల సమర్ధుడు. మీరు పరుగెత్తడానికి సిద్ధంగా ఉన్నంతవరకు అను క్షణం ఆయన శక్తిని, జ్ఞానమును, తన అపరిమితమైన కృపను ఇవ్వడానికి సిద్ధంగా ఉన్నాడు. I కోరింథీ 9:24,25 వచనాలు.  “24. పందెపు రంగమందు పరుగెత్తువారందరు పరుగెత్తుదురుగాని యొక్కడే బహుమానము పొందునని మీకు తెలియదా? అటువలె మీరు బహుమానము పొందునట్లుగా పరుగెత్తుడి. 25. మరియు పందెమందు పోరాడు ప్రతివాడు అన్ని విషయములయందు మితముగా ఉండును. వారు క్షయమగు కిరీటమును పొందుటకును, మనమైతే అక్షయమగు కిరీటమును పొందుటకును మితముగా ఉన్నాము.”  ఈ లేఖన భాగపు వివరణ ఒక గొప్ప దైవజనుని ద్వారా నేర్చుకుందాం. ‘ఒక వ్యక్తి తాను నమ్మినదాని విషయములో నిజముగా యధార్ధముగా ఉండడం సాధ్యమా? అతడు చిత్తశుద్ధితో మనఃపూర్వకంగా పోరాడుతూ, తన మనసు, శక్తివంచన లేకుండా జీవిస్తే ఇతరులకు అభ్యంతరంగా ఉండడు. పరిమితులతో జీవిస్తూ, క్రమశిక్షణలో ఉండడమంటే ఇదే! దేవుని నెరుగని వారు సహితము ఏదైనా సాధించడానికి నైపుణ్యం, శక్తి, బలము, శారీరక సమర్ధత, మానసిక స్థిరత్వముతో పోరాడుతూ, అన్నిటిలో పరిమితులతో జీవించడం అవసరమని భావించినపుడు, నిత్యత్వము, నిత్య జీవము, పరలోకమునకు సంబంధించిన విషయాల్లో  ఇంకెంత అవసరo? అన్ని ప్రయోగాలలో నిరూపించబడిన సత్యమేమిటంటే, ఎవరైనా గొప్పది ఏదైనా సాధించాలనుకుంటే, మితముగా ఉండడం, పరిమితులతో మెలగడం, తప్పనిసరి. మత్తు పానీయాలకు, సుఖభోగాలకు, భోజనప్రియత్వానికి ఇక మరేదైనా మీరు, నేను, బహుమానము పొందడానికి అడ్డుగా ఉంటే దాన్ని విడిచిపెటాడానికి సిద్ధంగా ఉండాలి. ప్రియ సోదరీ, సోదరుడా, బహుమానము పొందడానికి ఏది ఆటంకముగా ఉన్నా, దాన్ని నశింపచేయడం తప్పనిసరి. మన ముఖ్యమైన గురిని విస్మరించకూడదు. మీ తోటి విశ్వాసిగా ఈ మాటలు చెబుతున్నాను.
    ఇక ఆపో. పౌలు వివరించే మూడవ మార్గము మీ సామర్ధ్యమును కుదిర్చి సర్దిపెట్టుకొనండి. 26,27 వచనాలు. “26. కాబట్టి నేను గురి చూడనివానివలె పరుగెత్తువాడనుకాను, 27. గాలిని కొట్టినట్టు నేను పోట్లాడుట లేదు గాని ఒకవేళ ఇతరులకు ప్రకటించిన తరువాత నేనే భ్రష్టుడనై పోదునేమో అని నా శరీరమును నలగగొట్టి, దానిని లోపరచుకొనుచున్నాను.”  లేఖనము చెబుతున్నదేమిటి? అవసరమైన వాటిమీద మాత్రమే దృష్టించండి. నేను గురిలేనివానిలాగా పరుగెత్తడం లేదని ఆపో. సాక్ష్యమిస్తున్నాడు. గురివైపే పరుగెత్తుతుదాం. క్రైస్తవ విశ్వాసము విషయములో చేయవలసినవి ముందే నిర్ణయించబడ్డాయి. మనము త్రోవను వెతుక్కునే అవసరము లేదు. మీ విశ్వాసము నిజమైనదైతే ఇప్పుడు త్రోవలోనే ఉన్నట్టే! మన ప్రభువు చెప్పిన ఇరుకుద్వారము ఇదే! “జీవమునకు పోవుద్వారము ఇరుకును ఆ దారి సంకుచితమునైయున్నది” మత్త. 7:14 మనము ప్రస్తుతమున్న ద్వారము ఇదే! వెతుక్కోవలసిన అవసరములేదు. కాని, గట్టి నిర్ణయముతో పోరాడాలి. “గాలిని కొట్టినట్టు నేను పోట్లాడుట లేదు” అనే పౌలు మాటల్లో ఎంత పట్టుదల కనిపిస్తున్నది? పౌలు దినల్లో “బాక్సింగ్” అనే ఆట ఉండేది. దానిలో ఎదురాడు తున్న శత్రువును మట్టుమెట్టడమే గురి. ఎదురుగా శత్రువుండగా ఆ శత్రువును ఎదిరించకుండా గాలిలో ముష్టియుద్దం చేసే వ్యక్తిని మీరేమంటారు? బుద్ధిహీనుడేగదా!
    మీ శరీరాన్ని అదుపులో పెట్టుకొనండి. “నా శరీరమును నలగగొట్టి దానిని లోపరచు కొనుచున్నాను” అనే మాటలు గమనించరా? తన శరీరాన్ని సుఖానికి బానిసగా పౌలు చేయలేదు. తన శరీర స్వభావములోని దురాశలకు పౌలు దాసోహమనలేదు. తలదించలేదు. కాబట్టి వ్యక్తిగత క్రమశిక్షణ అలవాటు చేసుకోవాలి. నిన్ను నీవు అదుపులో పెట్టుకో. కొంచెం బలహీనంగా ఉండే ఘడియలలో కలిగే పాపపు కోరికలను జయించాలి. మనము చేసే క్రియలు మన మాటలకంటే బిగ్గరగా మాట్లాడతాయి. ఎంత బిగ్గరగా అంటే మన మాటలు ఎవ్వరూ వినరు. అంచేత శరీరమును సంపూర్ణంగా అదుపులో పెట్టుకోవడం అత్యవసరం.
    ప్రియ సోదరుడా, సోదరీ, ఈ నాటి లేఖనభాగములోని చివరి మాటలు ఎంత సవాలును మనలో ప్రతి ఒక్కరిముందు ఉంచుతుందో తెలుసుకున్నారా? పౌలు మాటల్లోనే విందాము.  “ఒకవేళ ఇతరులకు ప్రకటించిన తరువాత నేనే భ్రష్టుడనై పోదునేమో....”  మనము బోధించేది ఏదో అది మనము జీవించాలి. గమనించండి, ఎల్లప్పుడు మన మొదటి సవాలు, “ప్రస్తుతము” గతమంతా అయిపోయింది, దానిగురించి చింతిస్తూ కూర్చొంటే, ప్రస్తుతమును పోగొట్టుకుంటాము. కాని భవిష్యత్తు ముందు ఉన్నది. అది రానున్నది. కాబట్టి మనము చేయగలిగిందంతా ప్రస్తుతములోనే! ప్రియ సోదరుడా, సోదరీ, ప్రస్తుతము మీద ఏకాగ్రతతో, గట్టి నిర్ణయముతో దృష్టి సారించి మనలను మనము సంపూర్ణంగా సమర్పించుకోవాలి. శ్రద్ధతో, శ్రమతో ప్రతి అడుగు జాగ్రత్తతో వేస్తూ ప్రతి నిమిషము మన ప్రభువు యేసు క్రీస్తు వారిని సంతోష పెట్టడానికి జాగ్రత్తపడాలి. ఈ పరుగు పందెములో అదే ప్రాముఖ్యమైన విషయం!
    కొందరినైనా ప్రభువు కోసం సంపాదించగలమా? 22వ వచనం గమనించండి. “ఏ విధము చేతనైనను కొందరిని రక్షింపవలెనని...”  “సజీవ నిరీక్షణ” యొక్క గురి ఇదే! నా వ్యక్తిగత లక్ష్యం అదే! ప్రతి క్రీస్తు శిష్యుని గురి అదే కావాలని ప్రభువు మిక్కుటముగా కోరుతూ ఉన్నాడు.  అప్పుడే జయించినట్టు, బాప్తిస్మము తీసుకోగానే అయిపోలేదు. బైబిల్ పట్టుకోగానే రక్షించబడ్డట్టు కాదు. దేవుని సంఘముతో బాటు పాటలు పాడినంత మాత్రాన స్తుతి ఆరాధన కాలేదు. చివరకు దేవుని వాక్యమును బోధించినంత మాత్రాన సిద్ధించలేదు. ప్రియ సోదరీ, సోదరుడా, కొందరినైనా దేవుని రాజ్యము కోసం సంపాదించాలి. నీవు నిజమైన విశ్వాసివి అయితే ఇదే నా సవాలు:
•    నశించిన వారిని సంపాదించడానికి నీ ప్రయత్నాలలో ఏ లోపము లేకుండా చేయాలి.
•    సత్యము మీద ఏకాగ్రతను పొందడానికి నీ శక్తినంతా కూడగట్టుకో!
•    ప్రతి ఒక్క అడుగును ఆచి తూచి వేసి ప్రతి నిమిషం ప్రభువు కోసం అర్ధవంతగా జీవించేలా  మీ సామర్ధ్యమును కుదిర్చి సర్దిపెట్టుకొనండి. నీవింకా యేసు ప్రభువును నీ జీవితానికి హృదయానికి బయటనే ఉంచినట్లయితే, మిక్కటమైన ప్రేమతో మీకీ మాటలు చెప్పాలి. ఇవి స్వయానా యేసు క్రీస్తు ప్రభువు మాటలు. మత్తయి సువార్త 3వ అధ్యాయము 10వ వచనము “ఇప్పుడే గొడ్డలి చెట్లవేరున ఉంచబడియున్నది గనుక మంచి ఫలము ఫలింపని ప్రతి చెట్టును నరకబడి అగ్నిలో వేయబడును.”  12వ వచనం “ఆయన చేట ఆయన చేతిలో ఉన్నది; ఆయన తన కళ్లమును బాగుగా శుభ్రము చేసి గోధుమలను కొట్టులోపోసి, ఆరని అగ్నితో పొట్టును కాల్చివేయునని వారితో చెప్పెను.”  యేసు క్రీస్తును నిర్లక్ష్యం చేసినవారికి తీర్పు తప్పదు. ఎందుకంటే తీర్పు ఇప్పటికే ప్రతి ఒక్కరిమీద ఉన్నది. “ఆయనయందు విశ్వాసముంచువానికి తీర్పు తీర్చబడదు; విశ్వసింపనివాడు దేవుని అద్వితీయకుమారుని నామమందు విశ్వాసముంచలేదు గనుక వానికి ఇంతకుమునుపే తీర్పు తీర్చబడెను.” యోహాను సువార్త 3:18 విశ్వాసముతో విధేయతతోయేసు క్రీస్తు ప్రభువు వద్ద నీ పాపమును నీవు ఒప్పుకొని ఆయన అనుగ్రహించే క్షమాపణను అంగీకరిస్తే నిత్య తీర్పును, నరకమును తప్పించుకొని నిత్య జీవమును పొందుతావు. మీ స్వంత మాటలతో ప్రార్థన చేసికొనండి. మీకు దేవునితో సంబంధం ఎలా కలిగి ఉండాలో సహాయం కావాలంటే ఫోన్ చేయండి: 8143178111.

I కొరింథీ అధ్యయనం-27 9:19-27 జయించడమెలాగు? (మొదటి భాగము)

I కొరింథీ అధ్యయనం-27   9:19-27

జయించడమెలాగు? (మొదటి భాగము)

    ఓడిపోవాలనే ఆశతో పనిచేసేవారిని మీరు చూశారా? అది పని అయినా, వ్యాపారమైనా, ఆటలైనా, మరేదైనా? లేరనే సమాధానం చెప్పాలి. క్రైస్తవ జీవితములో కూడా అంతే. ప్రభువు నందు విశ్వసించనవారికందరికీ ఇతరులను ఆయన కోసం సంపాదించాలనే గురి ఉండాలి. యేసు ప్రభువు 70 మంది శిష్యులను, 12 మంది శిష్యులను ఇద్దరిద్దరినీ తన అధికారమిచ్చి పంపించారు. వారు ఇద్దరిద్దరుగా వెళ్ళి సువార్తను అందించి, సాక్ష్యమిచ్చి వారి జీవితాల్లో ఆయన చేసిన క్రియలను పంచుకున్నారు. ప్రభువు గలిలయలో ఇచ్చిన చివరి ఆజ్ఞ, “వెళ్ళండి”. “మీరు సర్వలోకమునకు వెళ్ళి సర్వసృష్టికి సువార్తను ప్రకటించుడి” మార్కు 16:15  దీన్నిబట్టి మనము ధైర్యంగా చెప్పగలిగిoదేమిటి? క్రైస్తవ్యం దాచుకునే హృదయములోనే ఉంచుకునే విశ్వాసము కాదు. సజీవ నిరీక్షణ రేడియో కార్యక్రమము ద్వారా మేము చేస్తున్నదిదే! సువార్తను, అనగా శుభవార్తను వింటున్న ప్రతి ఒక్కొక్కరికీ, అందరికీ తెలియ చెబుతున్నాము. సువార్త బంగరువాక్యములో స్పష్టమవుతుంది. “దేవుడు లోకమును ఎంతో ప్రేమించెను. కాగా ఆయన తన అద్వితీయ కుమారునిగా పుట్టిన వానియందు విశ్వాసముంచు ప్రతివాడును నశింపక నిత్యజీవము పొందునట్లు ఆయనను అనుగ్రహించెను.” యోహాను 3:16 హల్లెలుయా! బంగారము కంటే విలువైన ఈ వాక్యమును కంఠస్థం చేయండి, మీరు వెళ్ళిన ప్రతిచోట చెబుతూ ఉండండి. నిజముగా శాంతి సమాధానాలు వెదుకుతున్న ప్రతి హృదయమునకు దేవుని శక్తిగల మాటలు నెమ్మదిని, నిరీక్షణను, కలిగిస్తాయి.
        ఈ నాటి వాక్యభాగము I కోరింథీ 9:19-27. మన అంశం “జయించడమెలాగు?” ఈ లేఖనభాగములో విశ్వ్వాసిని ఆత్మలు సంపాదించడానికి సిద్ధపరచడానికి ఆపో. పౌలు కొన్ని మార్గాలు బోధిస్తున్నాడు. శ్రోతలూ, జాగ్రత్తగా వినండి.
    మొదటిది, నీ ప్రయత్నాలలో ఏ లోపము లేకుండా చేయాలి. “యూదునివలె ఉంటిని” “ధరశాస్త్రమునకు లోబడినవానివలె ఉంటిని” 20 వచనములోని ఈమాటలను జాగ్త్తత్తగా గమనించండి.  21వ వచనములో “ధర్మశాస్త్రము లెనివానివలె ఉంటిని” 22వ వచనములో “బలహీనులకు బలహీనుడనైతిని” అనే మాటలు గమనించండి. ఎలాగైనా వారితో మాటలాడి సువార్త సత్యమును పంచుకోవడానికి పౌలు వారితో సంబంధం కలుపుకుంటున్నాడు. కానీ తన విశ్వాసమును కానీ, తన సాక్ష్యమును కానీ తాకట్టు పెట్టలేదు, వారితో రాజీ పడలేదని స్పష్టంగా తెలుసుకొనండి. ఈ నాలుగు గుంపులవారితో సంబంధం కలుపుకున్నట్టు సాక్ష్యమిస్తున్నాడు. 1) యూదులు, 2)ధర్మశాస్త్రమునకు లోబడినవారు  3) ధర్మశాస్త్రము లేనివారు. 4)బలహీనులు. ఈ నాలుగు గుంపుల ప్రజలతో కలిసి వారిని సత్యములోనికి నడిపించాలని ఆరాటపడ్డాడు. ఆయన కేవలము ఒకదానివిషయమే శ్రమపడ్డాడు. అది సత్యమును వారికి తెలియచేయడం. యేసు ప్రభువు జీవించిన దినములలో యోహాను 3:16 ఎంత శక్తివంతంగా పనిచేసిందో ఇప్పుడు అంతే శక్తివంతంగా పనిచేస్తుంది. ఆనాడు, ఈనాడు మానవ అవసరత ఒక్కటే! ఎక్కడ చూసినా ప్రజలు మార్పు మార్పు, మార్పు అంటూ ఉన్నారు. పారుతున్ననది లాగా అంతా మారుతూనే ఉన్నది. కానీ, ప్రియ శ్రోతలూ, ఎన్నడూ మారనది ఒకటి ఉన్నదని గమనించండి. పాప క్షమాపణకు ఒక్కటే మార్గము. రక్షకుడు యేసు క్రీస్తు ప్రభువు  ఒక్కడే! దేవుని మనసులో అనాదినుండి ఇదే ప్రణాళిక. పాపమునకు క్రీస్తు రక్తము అనే ఒక్కటే పరిహారము. ఇందులో ఏ మార్పు ఎప్పుడూ లేదు. “యేసు క్రీస్తు నిన్న నేడు ఒక్కటే రీతిగా ఉన్నాడు” హెబ్రీ. 13:8 ఏ కులమైనా, ఏ మతమైనా, ఏ జాతి అయినా, ఏ అంతస్తు అయినా, ఏ ప్రాంతమైనా, ఏ ఊరైనా, ఏ పేరైనా, సందేశము ఒక్కటే! పాపుల రక్షకుడు యేసు క్రీస్తు ఒక్కడే! సువార్తను ఏ విధంగా మార్చడానికి ప్రయత్నం చేయకండి. సువార్తను పలచన చేయవద్దు. యేసు క్రీస్తు ప్రభువు తన ప్రాణమిచ్చి సంపాదించిన విమోచనను ఉన్నదున్నట్టుగానే పంచుకొనండి. అతి ప్రాముఖ్యమైన విషయమేమిటో తెలుసా, శ్రోతలూ? మన జీవితాలు దానికి అద్దం పట్టాలి. సందర్భానికి తగినట్టుగా సువార్తను చూపించాలి అనే మాటలు మీరు వినిఉండవచ్చు. సందర్భము ప్రతిచోటా ఒక్కటే, అది ప్రతి మానవునికి ఏ భేదము లేకుండా, రక్షకుడు, పాప క్షమాపణ నిరీక్షణ అవసరం. అదే మన సందర్భము. ప్రతి సందర్భములో ప్రతి ఒక్కరికీ యేసు రక్షకుని సాక్షిగా జీవించడానికి ఇప్పుడే నిర్ణయించుకొనండి.
    ఆపో. బోధిస్తున్న రెండవ మార్గము నీ శక్తినంతా కూడగట్టుకో! 24, 25 వచనములు. “ 24. పందెపు రంగమందు పరుగెత్తువారందరు పరుగెత్తుదురుగాని యొక్కడే బహుమానము పొందునని మీకు తెలియదా? అటువలె మీరు బహుమానము పొందునట్లుగా పరుగెత్తుడి. 25. మరియు పందెమందు పోరాడు ప్రతివాడు అన్ని విషయములయందు మితముగా ఉండును. వారు క్షయమగు కిరీటమును పొందుటకును, మనమైతే అక్షయమగు కిరీటమును పొందుటకును మితముగా ఉన్నాము.”  పౌలు ఒక మనోరంజకమైన ఉదాహరణనిస్తున్నాడు. ఆ దినాల్లో జరిగే ఆటలపోటీలు, క్రికెట్, ఒలింపిక్ గేమ్స్ లాంటిది. ప్రియ శ్రోతలూ, మనమంతా, ఒక దీర్ఘమైన పరుగుపందెము లో ఉన్నట్టు. మారథాన్ రన్నింగ్ రేస్. ఈ పందెములో వందలాదిమంది పాల్గొంటున్నారు. కొందరు ఏదో పరుగెత్తుతున్నాము, అంతే అనుకుంటారు. మానము మీద దృష్టిఉంచుకోవాలి.  ఆయన మాటలు జాగ్రత్తగా గమనించాలి. “పందెపు రంగమందు పరుగెత్తువారందరు పరుగెత్తుదురుగాని యొక్కడే బహుమానము పొందునని మీకు తెలియదా?”  అందరికీ బహుమానము పొందే అవకాశము ఉందని ఉపదేశం. “బహుమానము పొందునట్లుగా పరుగెత్తుడి.”  మీరు నాకంటే ముందు పరుగెత్తుతున్నా, వెనుక పరిగెత్తుతున్నా ఫర్వాలేదు. మనము యేసయ్యతో పరుగు పందెములో ఉన్నామంటే బహుమానము మీద దృష్టిపెట్టాలి. శక్తి అంతా కూడగట్టుకొని పరుగెత్తుతుదాము. మీరు నేను అందరికంటే వెనుక ఉన్నా బాధ పడవద్దు. పందెములోనే ముందుకు సాగుదాము. బహుమానము పొందేటట్టు పరిగెత్తాలంటే కొంత శిక్షణ అవసరం. అన్నింటిలో కొంత మితముగా, జాగ్రత్తగా ప్రవర్తించాల్సిఉంటుంది. ఏదికూడా హద్దుకు మించి చేయకుండా, మితిమీరి చేయకుండా జాగ్రత్తపడాలి. నిష్ణాతులు కావడానికి అధిగమించడానికి ప్రయత్నించండి. ఇవి ఆటలలో, పోటీలలో, పరుగు పందెములలో అవసరమైనప్పటికీ, అంతే మోతాదులో విశ్వాస జీవితములో కూడా అవసరం. విశ్వాసజీవితములో కూడా నిష్ణాతులు కావడానికి అధిగమించడానికి ప్రయత్నించండి. ఒక క్రైస్తవునిగా నీ విశ్వాసమునకు నీ పనిలో ప్రయత్నములలో పదును పెట్టు. నీ దృష్టి ఎల్లప్పుడూ పరిశుద్ధగ్రంధం మీదనే ఉంచుకో. కీర్తనకారుడు మొదటి కీర్తనలో అన్న మాటలు ఎల్లప్పుడూ గుర్తుంచుకోవాలి. “దుష్టుల ఆలోచన చొప్పున నడువక, పాపుల మార్గమున నిలువక, అపహాసకులు కూర్చుండు చోట కూర్చుండక, యెహోవా ధర్మశాస్త్రమునందు ఆనందించుచు దివారాత్రములు దానిని ధ్యానించువాడు ధన్యుడు.”   నీ శక్తినంతా నీవు కూడగట్టుకుంటున్నప్పుడు ఒక క్రైస్తవునిగా నీవు అధిగమించి, నిష్ణాతుడవు కావాలని, నైపుణ్యం సంపాదించాలనే గురిపెట్టుకొని సాగుతూ ఉండాలి. క్రికెట్లో కాని, మరేపోటీలలో కాని పాల్గొనాలని ఆశించేవారు చాలా క్రమశిక్షణతో జీవిస్తారు. ఇంకా 4 సంవత్సరాలు ఒలింపిక్ గేమ్స్ ఉండగానే ఇప్పుడే శిక్షణ ఆరంభమవుతుంది. కఠినమైన క్రమబద్ధమైన ప్రాక్టీస్ చేస్తూ ఉంటారు, ఆ విధంగా ప్రతిదినం చేస్తూ ఉంటారు. వారి శరీరాన్ని అణచుకొని అదుపులో పెట్టుకుంటారు. వారి మానసిక శారీరక నైపుణ్యం, సామర్ధ్యం ను అభివృద్ధి చేసుకుంటూనే ఉంటారు. ఆటలకు, పోటీలకు అవసరమైన రీతిగా శరీరాన్ని మనసును మలచుకుంటారు. ఇవి మన క్రైస్తవ విశ్వాస జీవితానికి అన్వయించుకోవాలి. మన శక్తినంతటినీ కూడగట్టుకొని, క్రమశిక్షణ, తర్ఫీదు చేసుకొని మన విశ్వాసపు పరుగు పందెములో పరుగెత్తడానికి సిద్ధపడి ఉండాలి. అప్పుడే బహుమానము పొందడానికి మనకు అవకాశముంటుంది. ప్రియ సోదరుడా, సోదరీ, నీకు బహుమానము పొందాలని ఆశ ఉందా? అయితే ఈ దినమే, ఇప్పుడే, నేడు అనే సమయముండగానే, బలమైన తీర్మానము తీసుకొని ఈ శిక్షణ ఆరంభించండి. దేవుని వాక్యము కంఠస్థం చేయండి. వ్యక్తిగతముగా పాపము ఒప్పుకుంటూ క్షమాపణ పొందుతూ విశ్వాసములో మెట్లు ఎక్కండి. మీకు అధ్యాత్మిక జీవితములో ప్రోత్సాహం, ప్రార్థనశక్తి
కావాలంటే, ఉ|| 10 నుండి 6 లోపల ఫోన్ చేయండి, లేదా మీ ప్రార్థన మనవి మెసేజ్ ద్వారా, వాట్సప్ ఆడియో మెసేజ్ కాని, వ్రాయగలిగితే స్పష్టంగా వాట్సప్ లేదా ఒక ఉత్తరంలోనైనా మీ ప్రార్థన మనవి, వ్రాసి పంపించండి. మీకు వ్రాయడము చేతకాకపోతే, ఎవరి సహాయమైన తీసుకొని చేయండి. మీకోసము ప్రార్థిస్తాము. మీకు నిజముగా ఆశ ఉంటేనే చేయండి. మీ స్వంత ప్రార్ధనతో ఆరంభించండి, మీకు సహాయకరముగా ఉండడానికి మీతో బాటు మేము ప్రార్దిస్తాము. కాని మీరు కేవలము మా లాంటి వారి ప్రార్ధనమీద ఆధారపడి మీరు ప్రార్థన చేయకుంటే, మేమేమి చేయలేము.