“సజీవ నిరీక్షణ” - క్రిస్మస్ సందేశము - దేవుడే మానవుడుగా జన్మించవలసిన అవసరత ఏమిటి?

 గమనిక: మీరు ఏ రీతిగా బైబిల్ అధ్యయనాల ద్వారా దీవెన, మేలు, హెచ్చరిక, ఆశీర్వాదం, ఆత్మీయ అబివృద్ధి పొందుతున్నారో, కామెంట్ లో వ్రాయండి, మీ ప్రార్ధన మనవి కూడా వ్రాయండి. దేవుని కృప మీకు తోడుగా ఉండి బలపరచుగాక!

“సజీవ నిరీక్షణ” - క్రిస్మస్ సందేశము 26 December 2021

దేవుడే మానవుడుగా జన్మించవలసిన అవసరత ఏమిటి?

     “సజీవ నిరీక్షణ” శ్రోతలందరికీ, ఒక్కొక్కరికీ, ప్రతి ఒక్కరికీ ప్రేమ పూర్వకమైన క్రిస్మస్ 

శుభములు! మీరు, మీ ఇంటిల్లిపాది యేసు క్రీస్తు ప్రభువు అనుగ్రహించే రక్షణ, నిరీక్షణ, పాప 

క్షమాపణ, విజయం, విడుదల నిండారుగా పొందాలనేదే మా ప్రార్థన, ప్రగాఢ వాంఛ! మీ 

అందరికోసం ప్రతి దినము తప్పక ప్రార్థిస్తున్నాము. మీరు కూడా ఈ 

పరిచర్య కోసం ప్రార్థించమని మనవి చేస్తూఉన్నాను. 

    

     క్రిస్మస్ పండుగను మనమెందుకు ఆచరిస్తున్నాము? ఆ దినాన దేవుని ఏకైక కుమారుడు యేసు 

క్రీస్తు ప్రభువు మానవుడుగా జన్మించినాడు. పరమ తండ్రి లోకరక్షకునిగా ఆయనను పంపించాడని 

లేఖనము సెలవిస్తున్నది. కుమారుడైన దేవుడు యేసుక్రీస్తు ప్రభువు మానవ శరీరము 

ధరించవలసిన అవసరత ఏమిటి అనే ప్రశ్నకు సమాధానాలు ఈ పూట అధ్యయనం చేద్దాం, 

రండి, రేడియొకు దగ్గరగా వచ్చి కూర్చోండి.

      

    ఈ భయంకరమైన పాపపు మానవలోకములో దేవుడే ఎందుకు మానవుడుగా జన్మించాలి? ఇక 

వేరే ఏ మార్గం లేదా? పరిశుద్ధుడైన యేసు క్రీస్తు ప్రభువు మానవడుగా జన్మించి దేవుని గొర్రె పి‌ల్లగా 

మన పాపమునకు పరిహారము చెల్లిస్తే తప్ప మనలను నిత్య నరకమునుండి రక్షించేవారెవ్వరూ 

లేరు. కానీ మానవునిగానే ఎందుకు? ఒక దేవదూతలాగా జన్మిస్తే సరిపోదా? ముమ్మాటికీ సరిపోదు. 

ఆయన మానవునిగానే జన్మించాలని, జన్మిస్తాడని, లేఖనములు ఆదికాండము నుండి ప్రకటన 

వరకు అతి స్పష్టంగా బోధిస్తున్నవి. 

     మొదటిది, దేవుడు మానవునిగా జన్మించడానికి కారణము I కోరింథీ 15:21లో వ్రాయబడింది. 

“మనుష్యుని ద్వారా మరణము వచ్చెను గనుక మనుష్యుని ద్వారానే మృతుల పునరుధ్ధానమును 

కలిగెను.” ఆదాము ద్వారా కలిగిన మరణము దేవుడే మానవుడుగా జన్మిస్తే తప్ప మన పాపము, 

శాపము, మరణము, నరకము నుండి మనకు విమోచన కలుగదు. దేవుడు ప్రేమామయుడు, అదే 

సమయములో న్యాయవంతుడు కూడా. ఆయన న్యాయమును బట్టి పాపమునకు శిక్ష విధించక 

మానడు. కానీ నీ మీద ఉన్న ప్రేమను బట్టి నిన్ను శిక్షించడు. దేవుని ప్రేమ, న్యాయము రెండింటి 

నెరవేర్పు క్రిస్మస్ ద్వారానే  సాధ్యమయ్యింది.

            దేవుడే మానవుడుగా జన్మించిన రెండవ కారణము, దేవుని పరిపూర్ణమైన ప్రేమను నీకు, 

నాకు వ్యక్తం చేయడo. 

            “... దేవుడు తన అద్వితీయ కుమారుని లోకములోనికి పంపెను; దీనివలన దేవుడు 

మనయందుంచిన ప్రేమ ప్రత్యక్షపరచబడెను.” గమనిస్తున్నారా శ్రోతలూ? ప్రేమ రుజువైతే తప్ప 

అది ప్రేమ కాదు. ప్రత్యక్షoగా, అనగా కన్నులకు కనబడేట్టుగా చూపించిందే నిజమైన ప్రేమ. 

దేవుడు “అగాపే” ప్రేమను యేసు క్రీస్తును లోకమునకు మానవునిగా పంపించడములో 

రుజువయ్యింది. ఎవరి ప్రేమను నీవు కన్నులారా, చూడకపోయినా, దేవుని ప్రేమ యేసు క్రీస్తులో 

ప్రత్యక్షంగా కనిపిస్తుంది.

     

        దేవుడే మానవుడుగా జన్మించిన మూడవ కారణము, మనలను మరణ భయము అనే 

దాసత్వమునుండి విడిపించడం. హెబ్రీ 2:15 “జీవితకాలమంతయు మరణభయము చేత 

దాస్యమునకు లోబడినవారిని విడిపించుటకును, ఆయనకూడ రక్తమాంసములలో 

పాలివాడాయెను. దేనికి భయపడక పోయినా మరణానికి భయపడని వారు లేరు. మరణము 

తరువాత ఉండే నిత్యత్వమునకు మరణము ద్వారా ప్రవేశము కలుగుతుంది. యేసు క్రీస్తు ప్రభువు 

మరణమును తన పునరుధ్ధానములో జయించినందు చేత ఆయనలో మరణించినవారు జీవ 

పునరుధ్ధానములో ప్రవేశిస్తారు. 

     

        దేవుడే మానవుడుగా జన్మించిన నాలుగవ కారణము, మన శోధనలలో మనలను అర్ధం 

చేసుకొని మనకు సహాయము చేయడం. హెబ్రీ పత్రిక 2;16-18 : “ఏలయనగా ఆయన 

ఎంతమాత్రమును దేవదూతల స్వభావమును ధరించుకొనక, అబ్రాహాము 

సంతాన  స్వభావమును ధరించుకొనియున్నాడు. కావున ప్రజల పాపములకు పరిహారము 

కలుగజేయుటకై, దేవుని సంబంధమైన కార్యములలో కనికరమును నమ్మకమునుగల 

ప్రధానయాజకుడగు నిమిత్తము, అన్ని విషయములలో ఆయన తన సహోదరుల వంటివాడు 

కావలసివచ్చెను. తాను శోధింపబడి శ్రమ పొందెను గనుక శోధింపబడువారికిని సహాయము చేయ 

గలవాడై యున్నాడు.” యేసు క్రీస్తు ప్రభువు మన ప్రధాన యాజకుడు. ఆయన మన పాపములకు 

పరిహారముగా తన పరిశుద్ధ రక్తమిచ్చి, మనలను తనకోసం సంపాదించుకొని, మనలను 

విమోచించాడు. అంతే కాదు, మన అనుదిన శోధనలలో మనకు సహాయము చేయడానికి ఆయన 

మానవునిగా దిగివచ్చాడు. ఆయన స్వయంగాను, తన పరిశుధ్ధాత్మ ద్వారాకూడ, మనము 

అనుదినం, ప్రతిక్షణం, ప్రతి విషయములో సహాయం చేయదానికి సంసిధ్ధంగా ఉన్నాడు. 

మనలాగా  శోధించబడినప్పటికీ, శోధనలన్నిటినీ గెలిచిన విజయశీలి. హల్లెలూయ! దేవునికి 

స్తోత్రం!!

     దేవుడే మానవుడుగా జన్మించిన అయిదవ కారణము, I యోహాను పత్రిక 3:8లో ఉన్నది. రెండవ 

భాగము. మీ బైబిల్లో గమనించండి కలర్ పెన్సిల్తో గుర్తు పెట్టుకోండి. : “అపవాది యొక్క క్రియలను 

లయపరచుటకే దేవుని కుమారుడు ప్రత్యక్ష మాయెను.”  "లయపరచుటకే" అనేమాటలో ఉన్న 

ఉధ్ఘాటనను గమనించాలి.  మన శత్రువు సైతానును వాని క్రియలను నశింపచేసి మనకు 

వాని శక్తులపైన విజయము అనుగ్రహించడానికి దేవాదిదేవుడు యేసు క్రీస్తు మానవుడుగా 

జన్మించాడు. విజయము పొందనివాడు విజయమెలా అనుగ్రహించగలడు? అవును! యేసు 

ప్రభువు సైతాను సమస్త శక్తులపైన విజయమును సంపాదించాడు. ఆయనే మనకు అపవాది 

శక్తులపైన విజయము నివ్వగలవాడు. ప్రతి శోధనలో పాపములో నుండి మనలను 

విమోచించడానికి పరమును విడిచి భూమి మీదికి మానవునిగా దిగివచ్చిన రక్షకుడు. యేసుక్రీస్తు 

ప్రభువు “నశించిన దానిని వెదికి రక్షించడానికి” జన్మించిన మనుష్య కుమారుడు.  ప్రియ 

శ్రోతలూ, ప్రతి ఒక్కరూ, ఏ  మతమైనా, ఏ కులమైనా, ఏ అంతస్తునకు చెందినవారైనా, 

నశించినవారే. యేసు క్రీస్తునకు బయట దేవుని ఉగ్రత, నిత్య నరకం, మరణభయం, ఆందోళన, 

చింత, దిగులు, కోపం, ఆవేశం, అజ్ఞానం. కాని యేసు క్రీస్తు నందు దేవుని విమోచన, రక్షణ, నిత్య 

జీవం, నెమ్మది, శాంతి సమాధానాలు, జ్ఞానము, నిరీక్షణ ఉన్నవి. మీరు ఏది ఎంచుకుంటారో, 

దీర్ఘంగా ఆలోచించి నిర్ణయం తీసుకొనండి, నిత్య జీవమును ఎంచుకునే శక్తి, కృప, సహాయము 

ప్రభువు మనకందరికీ అంగ్రహించుగాక! అమెన్!!  

మొదటి యోహాను పత్రిక 4వ అధ్యాయం 7-11 ఆధారంగా ఈ సందేశం ఇవ్వబడుతున్నది. 

      7. ప్రియులారా, మనము ఒకనినొకడు ప్రేమింతము; ఏలయనగా ప్రేమ దేవునిమూలముగా కలుగుచున్నది; ప్రేమించు ప్రతివాడును దేవుని మూలముగా పుట్టినవాడై దేవుని ఎరుగును.

    8. దేవుడు ప్రేమాస్వరూపి, ప్రేమలేని వాడు దేవుని ఎరుగడు.

   9. మనము ఆయన ద్వారా జీవించునట్లు, దేవుడు తన అద్వితీయ కుమారుని లోకములోనికి   పంపెను; దీనివలన దేవుడు మనయందుంచిన ప్రేమ ప్రత్యక్షపరచబడెను.

   10. మనము దేవుని ప్రేమించితిమని కాదు, తానే మనలను ప్రేమించి, మన పాపములకు ప్రాయశ్చిత్తమై యుండుటకు తన కుమారుని పంపెను; ఇందులో ప్రేమయున్నది.

   11. ప్రియులారా, దేవుడు మనలను ఈలాగు ప్రేమింపగా మనమొకనినొకడు ప్రేమింప బద్ధులమై యున్నాము.

   12. ఏ మానవుడును దేవుని ఎప్పుడును చూచియుండలేదు; మన మొకనినొకడు ప్రేమించిన యెడల దేవుడు మనయందు నిలిచియుండును; ఆయన ప్రేమ మనయందు సంపూర్ణమగును.