I కొరింథీ అధ్యయనం-9 3:10-17
ఒక సంఘమును ఏ విధంగా కట్టడం?
ఈ పూట బైబిల్ అధ్యయనం చేయడానికి చేరివచ్చిన ప్రతి ఒక్కరికీ శుభములు, వందనములు! మీరంతా
క్షేమంగా, సంతోషంగా ఉన్నారా? నిజమైన సంతోషం క్రీస్తులో తప్ప ఎక్కడా దొరకదు. ఇది ఎప్పుడైనా, ఎక్కడైనా, ఏ
పరిస్థితుల్లోనైనా దొరుకుతుంది. కానీ క్రీస్తులో మట్టుకే! గమనించారా శ్రోతలూ? మీ బైబిల్, నోట్ బుక్, పెన్ తెచ్చుకొని
ప్రశాంతంగా కూర్చోండి, ప్రార్ధించుకుందాం. ప్రార్థన:
అపోస్తలులు పెంతెకొస్తు దినాన ప్రార్థిస్తున్నారు. ఆపో. కా. జాగ్రత్తగా పరిశీలిస్తే, ఆ దినాన ఆ విధంగా
జరుగుతుందని వారు ఊహించలేదు. కానీ, యోవేలు ప్రవక్త ప్రవచించినట్టుగా, యేసు ప్రభువు వారికి చెప్పిన మాటల
నెరవేర్పుగా, పరిశుద్ధాత్ముడు వారి మీద కుమ్మరించబడ్డాడు. అది జరిగినపుడు దేవుని ఆత్మ వారికి శక్తినిచ్చినరీతిగా
వారు మాట్లాడారు. గమనించండి, శ్రోతలూ, వారు వ్యూహరచన చేయలేదు. ‘ఇప్పుడు మనమేమి చేద్దాం’ అని
సమాలోచన చేయలేదు. ‘పరిశుద్ధాత్ముడు మనమీదికి వచ్చాడుగదా, ఇప్పుడు మనమేమి చేద్దాం’ అని
మాట్లాడుకోలేదు. ఆత్మదేవుడు శక్తినిచ్చిన రీతిగా వారు మాట్లాడారు. ఆదిసంఘములో పరిశ్దుద్ధాత్ముడు పనిచేసిన
విధానo మరొకటి గమనిద్దాం, రండి, రేడియోకు దగ్గరగా వచ్చి కూర్చోండి. అది అంతియొకయలో జరిగింది. పౌలు,
బర్నబాలు ఇతర విశ్వాసులతో కలిసి ప్రతిదినం సేవ చేస్తూ, బోధ చేస్తూ ఉన్నప్పుడు అది జరిగింది. అ. కా. 13లో
ఉన్నరీతిగా దేవుని ఆత్మ “నేను బర్నబాను, పౌలును పిలిచిన పనికొరకు వారిని నాకు ప్రత్యేకపరచుమని” చెప్పాడు.
ఇక్కడ వ్యూహరచన చేసిన మీటింగ్ ఏమైనా మనకు కనిపిస్తుందా? లేదే! ఏమి చేద్దాం, ఏ విధంగా ముందడుగు
వేద్దామని ఆలోచించినట్టు వ్రాయబడలేదుగదా! దేవుని ఆత్మ వారిమీద సంచరించినట్టుగా వ్రాయబడింది. ఆయన
చెప్పినట్టు వారు చేశారు. ఈ రెండు సందర్భాలలో విశ్వసించినవారు పరిశుద్ధాత్మునికి లోబడి విధేయత చూపించారు.
వారిలో ఎంత సిద్ధమనసు ఉందంటే, పరిశుద్ధాత్మునికి వారిని నడిపించడానికి సాధ్యమయ్యింది. ఆయన మాట
వినడానికి వారు ఎంత సుముఖంగా ఉన్నారంటే, పరిశుద్ధాత్ముడు వారితో సంభాషణ చేశాడు. ఈనాడు, సంఘాలు
స్థాపించడానికి వ్యూహరచన చేయడం మనము వినిఉంటాము. ‘ఏమి చేద్దాం,’ అని ‘ఏ అడుగులు వేద్దామని’ రకరకాల
ఆలోచనలు పలుచోట్ల జరుగుతూ ఉన్నాయి. ఆపో. పౌలు సంఘమును స్థాపించడమును ఒక బిల్డింగ్ కట్టడముతో
పోల్చాడు. దాని బ్లూప్రింట్, లేదా ప్లాన్ I కోరింథీ 3:10-17లో ఉన్నది, లేఖన భాగం చదువుకుందాం, మీకు వీలైతే,
నాతో బాటు బిగ్గరగా చదవండి: I కోరింథీ 3:10-17
ఒక సంఘాన్ని స్థాపించడానికి ఆపో. పౌలు ఇచ్చిన ప్లాన్ లో కొన్ని నమూనాలు, లేదా చిత్తుపటములు కనిపిస్తున్నవి. 10, 11 వచనాలు జాగ్రతగా గమనించండి. “దేవుడు నాకనుగ్రహించిన కృపచొప్పున నేను నేర్పరి యైన శిల్పకారునివలె పునాదివేసితిని, మరియొకడు దాని మీద కట్టుచున్నాడు; ప్రతివాడు దానిమీద ఏలాగు కట్టుచున్నాడో జాగ్రత్తగా చూచు కొనవలెను. వేయబడినది తప్ప, మరియొక పునాది ఎవడును వేయనేరడు; ఈ పునాది యేసు క్రీస్తే.” పౌలు నేర్పరియైన శిల్పకారుని పునాది వేశానని చెప్పాడు. నేర్పరియైన శిల్పకారుని పునాది అన్న మాటలు ఒక ఇల్లుకట్టేవాని పదజాలము కదూ! ఒక నేర్పరి అయిన ఇల్లుకట్టే వాడు ఒకదానికి మరొక దానితో ముడిబడిఉన్న అన్ని విషయాలను కూలంకషంగా తలంచుకుంటాడు. ఏ పొరబాటు, తప్పు, అజాగ్రత, బుద్ధిహీనత లేకుండా చూసుకుంటాడు. ఆ విధంగా పునాది వేశానని పౌలు చెప్పడం గమనించారా? ప్రియ శ్రోతలూ, అన్నింటిలో ఇది ముఖ్యమైనది. కలకాలము ఉండే ఏ భవనమైనా బలమైన, పటిష్టమైన పునాదితోనే ఆరంభమౌతుంది. పునాది ఒక్కటే అని మనకు బోధించబడుతున్నది. ఆయన వేసిన పునాదితప్ప ఇక వేరే ఏ పునాది ఎవ్వరూ వేయలేరని ఆపో. స్పష్టపరుస్తున్నాడు. ఆ పునాది యేసు క్రీస్తే! హల్లెలూయ! పునాది ఒక్కటే ఉంటుంది, ఎన్నో ఉండవు. ఈ రోజుల్లో దేవుని వద్దకు వెళ్లడానికి ఎన్నో మార్గాలు ఉన్నాయని ఎవరికి తోచినట్టు వారు భావిస్తారు. దేవుని పరిశుద్ధ వాక్యం ప్రకారం ఇక వేరే ఏ పునాది లేదు. పాస్టర్లైన, సువార్తికులైన, విశ్వాసులైనా, మరెవ్వరైనా, దీనికి విరుద్ధంగా బోధించినా, నమ్మినా, అది వాక్యానికి విరుద్ధమైనది, దేవుడు అంగీకరించడు. ఈ పునాదికి ఇక వేరే ఏదీ కలపడానికి దేవుని వాక్యం అంగీకరించదు. యోహాను సువార్త, 14:6లో ప్రభువు నిర్దిష్టంగా బోధించిన మాటలు ఏమిటి? “యేసు చెప్పెను: నేనే మార్గమును, సత్యమును, జీవమును; నాద్వారానే తప్ప ఎవడును తండ్రియొద్దకు రాడు.” ఆపో. పేతురు కూడా ప్రభువు తప్ప వేరే రక్షకుడు లేడు అనే సత్యమును చాలా బలముగా బోధించారు. అ. కా. 4:12: “మరి ఎవని వలనను రక్షణ కలుగదు; ఈ నామమునే మనము రక్షణ పొందవలెనుగాని, ఆకాశము క్రింద మనుష్యులలో ఇవ్వబడిన మరి ఏ నామమున రక్షణపొందలేము” ప్రియ శ్రోతలూ, అది విగ్రహముగాని, పేరుగాని, ఆచారముగాని, సిద్ధాంతము గాని దేనివలన పాపములకు క్షమాపణ కలుగదు. కాబట్టి సంఘము స్థాపించాలని, అభివృద్ధి చేయాలని ఆశించే వారెవరైనా, కాపరి అయినా, సువార్తికుడైనా, సంఘపెద్ద, పరిచారకుడు, విశ్వాసి, ఎవరైనా, ఈ పునాది వేయడం అత్యవసరం, లేదా కట్టడం నిలబడదు.
రెండవ నమూనా ఆ పునాది మీద ఏ వస్తువులతో కడుతున్నామో, వేటిని ఎంచుకోవాలో జాగ్రతగా పరీక్షించడం. 12-15 వచనములు గమనించండి. “12. ఎవడైనను ఈ పునాదిమీద బంగారము, వెండి, వెలగల రాళ్లు, కఱ్ఱ, గడ్డి, కొయ్యకాలు మొదలైనవాటితో కట్టినయెడల, 13. వాని వాని పని కనబడును, ఆ దినము దానిని తేటపరచును, అది అగ్నిచేత బయలు పరచబడును. మరియు వాని వాని పని యెట్టిదో దానిని అగ్నియే పరీక్షించును. 14. పునాదిమీద ఒకడు కట్టిన పని నిలిచినయెడల వాడు జీతము పుచ్చుకొనును. 15. ఒకని పని కాల్చివేయబడిన యెడల వానికి నష్టము కలుగును; అతడు తనమట్టుకు రక్షింపబడును గాని అగ్నిలో నుండి తప్పించుకొన్నట్టు రక్షింపబడును.
పునాది మీద బంగారం, వెండి, విలువైన రాళ్ళతోనైనా కట్టవచ్చు. లేదా, కర్ర, గడ్డి, కొయ్యకాలుతోనైనా కట్టవచ్చు. ఈ ఆరు వస్తువులను పైనుండి క్రిందిదాకా జాగ్రతగా పరిశీలిస్తే, ఒకదానికంటే మరొకటి హీనమైనది, అవునా? బంగారం శ్రేష్టమైననది. నశించిపోయే ప్రసక్తి లేదు. రెండవది, వెండి, మూడవది, ప్రశస్తమైన రాళ్లు. ఈ మూడు నశించలేనివి. కాలిపోవు, రోమా సైనికులు యెరూషలేము దేవాలయమును కాల్చినపుడు, బంగారం కరిగి రాళ్లమధ్యలోనికి కారిందే తప్ప కాలిపోలేదు. ఈ మూడు నశించిపోయే వస్తువులుకాదు. మిగిలిన మూడు ఏమిటి? కర్ర, గడ్డి, కొయ్యకాలు. ఇవి క్షణికమైనవి. పనికిరానివి. గడ్డితో ఇల్లు కప్పుకుంటే, అగ్ని తగలితే కాలిపోతుందా లేదా? కర్ర అయినా అంతే, కొయ్యకాలైతే, క్షణాల్లో కాలిపోతుంది. అన్నిటిని బయట పెట్టే దినము వచ్చినపుడు అగ్ని వీటన్నిటిని పరీక్షిస్తుంది. నిలిచిఉండే రీతిగానైనా కట్టవచ్చు. నశించిపోయే రీతిగానైనా కట్టవచ్చు. ప్రియ శ్రోతలారా! రెండవ కోవకు చెందినవి ప్రస్తుతం మన మధ్యలో చాలా ఉన్నవి. పైపైకి కనిపించేవి అవే. ఎంతో ఉత్సాహముతో వాక్యముగురించి మాట్లాడడం, ప్రార్ధనగురించి మాట్లాడ్డం, వాట్సప్ లో మనకు ఇష్టమైన పోస్టులు పెట్టడం, కానుకలు ఇవ్వడం, చర్చలు చేయడం, ప్రార్థన గురించి మాట్లాడడమే తప్ప ప్రార్థన ఎంతో తక్కువ చేయడం, ఇంకా ఎన్నెన్నో, ఏమేమో! ఇవన్నీ పైపైన కనిపించి నంతమాత్రాన నిత్యము నిలువబడవు. కాబట్టి దేనితో నీ విశ్వాసమును, నీ జీవితమును కట్టుకుంటూన్నావో, లేదా నీ సంఘమును కడుతున్నావో, పరీక్షించ వలసిన అవసరం చాలా ఉన్నది.
మూడవ నమూనా పరిశుద్ధాత్మను ప్రతిష్టించి ఆయనకు నీవు విధేయత చూపడం. 16, 17 వచనాలు: “16. మీరు దేవుని ఆలయమై యున్నారనియు, దేవుని ఆత్మ మీలో నివసించుచున్నాడనియు మీరెరుగరా? 17. ఎవడైనను దేవుని ఆలయమును పాడుచేసినయెడల దేవుడు వానిని పాడుచేయును. దేవుని ఆలయము పరిశుద్ధమై యున్నది; మీరు ఆ ఆలయమై యున్నారు.” గమనించారా, శ్రోతలారా! మీరు మారుమనసుపొంది పాపములు యేసు రక్తములో శుద్ధిచేసుకున్నవారైతే, మీరే దేవుని మందిరము, ఆలయము, నివాసము. ఎంత గొప్ప ధన్యత! హల్లెలూయ!! ఆలయము అన్న మాటను అర్ధం చేసుకోవాలంటే అరణ్యములో మోషే కట్టిన ప్రత్యక్ష గుడారమున గురించి ధ్యానించాలి.యెశయ్యను కలిగిన హృదయం ఆనాటి ప్రత్యక్ష గుడారమునకు పోలిక. ప్రత్యక్ష గుడారములో దేవుడే అందులో నివాస ముండేవాడు. మోరీయ పర్వతం మీద సోలోమోను కట్టిన దేవుని మందిరములో దేవుని ప్రసన్నత, పరిశుద్ధత నివాసముండేవి. అవి దేవుడు తన ప్రజలతో కలుసుకోవడానికి ఏర్పాటు చేసిన పద్ధతి, స్థలము. దీనిని ఆపో. పౌలు జ్ఞాపకం చేస్తూ, మనమే దేవుని పరిశుద్ధ ఆలయమని పరిశుద్ధాత్ముడు మనలో జీవిస్తున్నాడని జ్ఞాపకం చేస్తున్నాడు. ఆనాటి మందిరము దేవుని మహామహిమతో, పరిశుద్ధతతో నిండి ఉండేవి. ప్రియ సోదరీ, సోదరులారా, మన శరీరాలు దేవునికి ఆలయమని మనము గుర్తించామా? మనలో ఆయన నిండుగా ఉండి, మనలను ఎల్లప్పుడూ పరిశుద్ధతలో నడిపించి బలపర్చడం దేవుని ఉద్దేశ్యం. కాబట్టి దేవుని ఆలయమైన మన శరీరాన్ని పాడుచేయకూడదు. మన సంఘాల్లో, మన కుటుంబాల్లో ఉండే, జగడాలు, ఆధిపత్య పోరు, కులతత్వం, ఒకరిమీద మరొకరికి ఉండే అసూయ, ద్వేషం, ఇలాంటివన్నీ దేవుని ఆలయమును పాడుచేయడం కాక మరేమిటి? సంఘాల్లోఉన్న జగడాలు చాలవన్నట్టు కొందరు సంఘాన్ని కోర్టులకు, న్యాయస్థానాలకు ఈడ్చినవారి సంగతేమిటి? మీరు, నేను, దేవుని సంఘమును ఏ రీతిగా ఘనపరుస్తున్నామో అతి జాగ్రతగా పరీక్షించుకోవాలి. పరిశుద్ధాత్ముడు మనలో, మన సంఘాల్లో నివసించడం ఎంత ఘనమైనదో, ఎంత మహిమతో కూడిన ధన్యతో మీరు గమనించారా? అయితే వీటన్నినీ వెంటనే విడిచిపెట్టి దేవుని ఆత్మకు మనము లోబడి ఆయనను మహిమ పరుద్దాము. అప్పుడే ఆయన షెకినా మహిమను మనము అనుభవించి ఆనందించగలుగుతాము. కొందరు బలమైన విశ్వాసులని పిలువబడుతూ చలామణి అవుతున్నవారు సైతం కుళ్లిపోయిన పండులాగా ఉండవచ్చు. దేవుని తీర్పును తప్పించుకోవడానికి మనము మారు మనసు పొందడానికే ఇంకా బ్రతికి ఉన్నమేమో! మన శరీరాలు, ఆలోచనలు, ఉద్దేశ్యములు, తలంపులు, క్రియలు, అంతరంగములోని సమస్తము పరిశుద్ధపరచబడితే తప్ప మనము ఆయన తీర్పును, ఉగ్రతను తప్పించుకొని, దానికి బదులు ఆయన కృప, అభిషేకం, నింపుదలను పొందలేము! ఈ గొప్ప ప్రక్రియకు అవసరమైనంత మహా కృప యేసు క్రీస్తు ప్రభువే మనలో ప్రతి ఒక్కరికీ, సర్వ సమృద్ధిగా అనుగ్రహించుగాక! అమెన్!!